البروق اللي علت نجد العذيه=هيضت حبر المشاعر للكتابه
والقفار المجدبه ياأهل الحميه=كيف تصبح لارتفع صوت السحابه
من غياب ضيق صدور البريه=تشتكي ليل المدامع والكآبه
الشهر كنه دهر والدهر ميه=والضلوع تضيق والضيقه غيابه
ياسلام الله سلام في تحيه=للزعيم اللي رقا المجد وعلابه
كل حرف من حروف الابجديه=جر له صوت مثل صوت الذيابه
لازهمته بالعلوم الاوليه=جاب لي درة علوم من كتابه
الوفاء مزروع والنبته نديه=للمليك اللي حماها في خطابه
جابله ربي على حب الرعيه=جامع تاج التواضع والمهابه
في يمينه للبشر عدل وسويه=وفي شماله دلة العز وشرابه
الغيوم تزول والا الشمس حيه=يحفظ التاريخ ماسطر جنابه
ماخذوها بالغدر والا هديه=غير شلفا عانقت بالحق بابه
الحكم قبضه وقول الحق نيه=المواطن سيف والموطن جرابه
وقبل لأنهي واجبي هذي وصيه=للضعوف اللي عطت نهج العصابه
أرتدت ثوب الخيانه والاذيه=وكيدها في نحورها زاد ألتهابه
علموها شعبكم وايضا البقيه=قالها شخص مواطن بالنيابه
لو يدور الوقت وتدور الضحيه=عهدنا لملوكنا مفتوح بابه
الغناة بدارنا ماهي قضيه=العزيز من البشر ماارخص ترابه