الحـــب مـــا كفر ذنوب المحبين =عاشوا بــحق قلوبهم مذنبيني
يركز على صدر المولع نياشين =ويجمع لـه الحساد والشامتيني
متبوع في الدنيا ومشروع في الدين=فطره مع الكفار والمسلميني
وانا على سلم الرجال المسمين =كسابةٍ الثنتين دنيا وديني
اللي ليا قروا تقر الموازين =فعلٍ ضروبه من قديم السنيني
وقفت بين العقل والقلب والعين =واحترت في عقلي وقلبي وعيني
ادُور الخيره وأنا بين ثنتين=واللي يجيني من وراها يجيني
آخذ من نجوم المجره براهين=وافلج دعاوى الجدي بالفرقديني
وين انت يامسرج هجوسي وأنا وين=عيت وساع البيد تقطع حنيني
ألف وثلاثميه وخمسة وستين =كيلو متر بالضبط بينك وبيني
كيلتها والقلب مـــــع كل مترين=يقسى على حدب الضلوع ويليني
يالينه جيتك على العسر واللين =أرد عــــن يسراي صفقة يميني
خليني اكتــب لهفتي بين قوسين =وحطي تحتها خـــط واستوعبيني
ما عندي الا قلب لــــو معي قلبين=والله لاعلق صورتك فـــــي الثنيني
وابدع لحن واطوح الصوت صوتين=اما علــــــى المسحوب ولاالهجيني