جزاك الله خيرا ومشكور اخي ابن غنام
ويقول الشاعر ذياب العتيبي

سر ياقلم واكتب من الهرج ماطاب
بيوت شعر تعجب اللي قراها
ليا سمعها عارفن قال قد صاب
وعز الله انه بالمعاني كساها
يومه نشدني واحدن قال ياذياب
وش رايك بناسن كثيرن بلاها
ليا جيتهم لافي يشرع لي الباب
ومن قبل ماصل قد وصلني نباها
ومن هرجهم ماعندهم غيري احباب
ولقفيت يلحقني على طول اذاها
والكل منهم للعراقيب شذاب
هذا يسويها وهذا رماها
بالبندق اللي رميها دوم كذاب
لو ترمي الضلعان بين خطاها
مجالسن صارت مثل جند الاحزاب
تجمعت وابليس ضيع جداها
عطني نصيحه يوم تفهم فالاعراب
وتعرف خبر جملتك من مبتداها
ناظرت في قوله ودقتت بحساب
وجدت لي عله صعيب دواها
مافيه مخلوق يغير فالألباب
قلوب البشر رب البرايا براها
فالناس حر وفيه عصفور وغراب
واختر لنفسك ما يناسب هواها
وجامل بضحكة سن واخذ بالأسباب
وعين الضعيف أحذر تدور عماها
خله يروح لحاله إن خاب وان طاب
عابر سبيل وواصل منتهاها
واعرف ترا الخيمه بعمدان واطناب
وبأوتادها تكمل ويكمل بناها
ومن طاول الدنيا تجيه ام غصاب
وياعزتي له كان جاته وجاها
ذي عادة الدنيا تقلب تقلاب
عقب الفرح ترجع تسوي عزاها
واعمل ليوم فيه حاسب وحساب
يوم القيامه كل نفس وجزاها
وميزان عدل خالقه رب الارباب
قدامك اعمالك بعينك تراها
والله كريم ويقبل العبد لاتاب
اللي علم جهر النفوس وخفاها
وعلى رسول الله وآله والاصحاب
صلوا عدد نجم لمع في سماها