علـى الله المعبـود ربـي توكلـت=الدايـم الجبـار والعـبـد هـالـك
يـارب سبحانـك بذاتـك تكمـلـت=سبحانـك المعبـود جـل جـلالـك
يارب تغفـر زلتـي لـك توسلـت=أنـت الإلـه اللـي نعبـده لحالـك
الخلق فيهم فرق واضـح ولازلـت=أقول بعض الناس بالطيـب سالـك
ياعاذلي مسمعك لـو قلـت ماقلـت=إسمع جوابي قبل لا أسمـع سؤالـك
مثقال ذرة لـو تحملـت مـاشلـت=وجمال أبو خالد ليا طحـت شالـك
وإلا أنت عن درب المراجل تحرولت=وإليا خسرت المرجلـة وش بقالـك
لا كاسبٍ دينـك ولا نعـم حصلـت=لا تحسبٍ الطيب فـي راس مالـك
الطيب في راس المناعير وش قلـت=ياللي حرامك مختلـط مـع حلالـك
أبمدح الطيـب وأنـا مـا تكاسلـت=عن واجبه وإلا أنت بقطع وصالـك
جمـال يـاراع الجمايـل تجمّلـت=إسمـك جمـال وجمّـل الله حالـك
مشيت درب الطيب والجود ماملـت=امنجبٍ من صـوب جـدك وخالـك
حراً ولـد حـراً وللطايلـة طلـت=وإلا الردي معروف مـن دون ذلـك
يعجز ولا هو نايل ٍ مثـل مـانلـت=تقصر يمينه عـن فعايـل شمالـك
رقيـت للقمـة ولا يـوم حـولـت=ما هي غريبة دايـم الطيـب فالـك
لا صاح صياح الضحى ماتخاذلـت=تقضي لزوم اللي من الضيم جالـك
هذي حقيقة واضحـة مـاتخيلـت=مثلك قليـل ونـادرٍ فـي خِصالـك
أرضيت بعض الناس والآخر أزعلت=أزعلت منهو خاطـره مـا صفالـك
يحماك رب البيـت لقفيـت وأقبلـت=وتعمى عيون الحاسـد إليـا نوالـك
والمعذرة وإن كـان بالمـدح قللـت=فعلـك ينـوّر ليـل مظلـم وحالـك