بديت البيـوت بذكـر انـا طالبـك يالله = تيسـر لنـا القيفـان والنفـس مامـوره
نبي نصخر القيفـان للـي نبـا ننصـاه = عسى ابياتنا تطلع على الكيف مصخوره
وبعدها فـلا كـل ٍ يزبـن لمنهـو جـاه = ولا كـل رجـال يبـا يحتـمـي دوره
احد ياصل الهقوه واحد تنتصف هقـواه = واحد يخلف الهقوه ولـو دق لـك زوره
وانا وسط قلبي صاحب ٍ حالف ٍ منسـاه = رفيق ٍ ليا جا العلـم مايعـرف البـوره
ليـا عـد فعلـه ماقفـه تطلقـه يمنـاه = على الطيب واهل الطيب يومي بباكـوره
كريم وحكيم وديـن رب السمـا بـد ّاه = وجريح الزمان يصيـر طبـه ودكتـوره
ابوخالد اللي جعل ولـد الـردي يفـداه = ابا اسند عليه العلـم يفـزع بمذخـوره
إلي قصة ٍ حطت بوسط الحشـا عرقـاه = ابا اشاوره في قصتي واستمـع شـوره
انا لي عشيرٍ سل حالـي سبـب فرقـاه = كتمت الصواب وحالي اليوم مخطـوره
لقيته زمان ٍ فات فـي رقـرق ٍ يرعـاه = لقيته وانـا قنّـاص يمشـي بمظهـوره
ولفتني جماله غصب سبحان من سـو ّاه = ملاك ٍ عطـاه الله بالشكـل والصـوره
وسلمت في دربي ورد وقصـر ممشـاه = وبدا يختلف مشيـه ويغضـي بمنظـوره
وتذكرت من مشيه وشكله وذيـر خطـاه = جفيل المهاه اللي مـن النـاس مذيـوره
توقّفت عن دربي وقلبـي يتـل اقصـاه = غريب ٍ عن اهل الدار والنفس مجبـوره
وسألته بعد جيته عن الدار ويش اسمـاه = وعسى الدار ياهل الدار بالغيث ممطوره
ونظر لي بعين ٍ من نظرهـا يجـر الآه = سهمها ينز ّل قايـد القـوم عـن كـوره
وتكلم وقال الدار ماعشـت فـي مربـاه = ولاني بعرف اسما صحاريه وقصـوره
لكن المطر ممطـور ناظـر بقايـا مـاه = وتفر ّ ج بعينك فـي ظواميـه وطيـوره
وتكلـم كـلام ٍ ياحلـو منظقـه بشفـاه = خصوصا ً بعد مابثلـي خافـي شعـوره
وصراحه يبو خالد تعاهـدت انـا ويـاه = عهد بيننا بعـد ماقسـى الوقـت لازوره
وتركته بروض ٍ شوفته تنعش اللي جـاه = إليا نسنـاس الهـوى فاحـت عطـوره
جمال الطبيعه يوم اناظـر جمالـه تـاه = تفوق الطبيعه وإبنـة النـاس مستـوره
وذكرت العهد واتعبت نفسي وجيت حماه = ولقيت الديار مـن المخاليـق مهجـوره
وبديت العصير براس رجم ٍ صعب مبداه = أجـر الونيـن ودمعـة العيـن منثـوره
وجلست أتذكّر لين سرحان جـر عـواه = يجر العوى والجوع يلعـب بحنجـوره
ولاجاوبه غير الصـدى والهـوى يقفـاه = ورجمي بدت تنعـق حناديـه ونصـوره
وبديت أتفكر ويـن حكـم الزمـن ود ّاه = رحل للحجاز ورحت انا لـراس تنـوره
وترى اخر معالمهم من أهل الكرم والجاه = لهم في زمان ٍ فـات وقفـات مذكـوره
سلايل حصان ٍ طاح خمسين من شلفـاه = حكم نجد ياتركي قبل حكم اخـو نـوره
وانا اليوم يابن العم محتـار ويـن القـاه = وتصيتك بقيفانن على الفـرخ مسطـوره
وأصلي وأسلم عد مزنٍ شمـل مسـراه = على الهاشمي عداد ما لاح مـن نـوره

يالله تجعلنـا لـك أقـراب وأحبـاب = وتجعل لنا حظ ّ ٍ مـع اللـي حببتـه
وتجعل دعانا مايجي دونـه حجـاب = وتثيبنـا مـع كـل مخلـوق اثبـتـه
وطالبك عفوك في مشيبي وانا شـاب = عـن كـل ذنـب ٍ فالحيـاه ارتكبتـه
والبارحه جانـي مراسيـل وكتـاب = مـن واحـد غالـي ورد ّه كتبـتـه
كتبت رد ّه والدعـاوي لـه اسبـاب = علم ٍ صحيـح ويسمعـه ماأستغبتـه
مدّيت له كـف المخـاوى للاغـراب = ومن بـد بيضـان الوجيـه انتخبتـه
يوم الزمن كشّر عن الضرس والناب = والوقـت ميّزنـا ربوعـه وسبـتـه
ماعاد أخاوي غير عكفـان الأشنـاب = والدون لـو جـا فالطريـق اجتنبتـه
خوّة قنص يطرب لها كـل طـرّاب = علـى النقـا بانـت ولاهيـب غبتـه
قال أسمحولي عندي ظروف وأنشاب = وكم موعد ٍ من كثر الاشغـال غبتـه
وأثره يخطـط نـاوي ٍ لـه بمهـذاب = وأنـا علـى نيّـه معـه ماستربتـه
وكل ّ ٍ رحل من فوق عجلات الأنداب = ناصر ضرب دربه ودربي ضربتـه
ناصـر عليهنّـه تحلّـى بالأسـلاب = وأنـا عليهنّـه شماغـي عصبـتـه
اقطع تهاتيه الخـلا عشـرة أوجـاب = وان زدت يـوم بحسبتـي ماكذبـتـه
حيث إن للرحلـه منظّـم وحسّـاب = وعلومنـا عنـد الرياجـيـل ثبـتـه
وأنا أحمـد الله ماخسرنـا بالأتعـاب = ومن لا أجتهد فأمره حصيلـه تعبتـه
طبّيت فـي دار ٍ نواويـر وأعشـاب = ريح الصبـا تلعـب بعالـي عشبتـه
يرعابها صيد ٍ عن النـاس هـر ّاب = واللـي تدنـيـه المنـيّـه قضبـتـه
داره عفو مخلي من النـاس ومهـاب = ولولا عزومي مع هل الصيت هبتـه
مادق فيهـا شـاوي البـدو منسـاب = ولاطبهـا الوبّـال يـدفـع جنبـتـه
مع خوّة الوافيـن صافيـن الأ لبـاب = اللـي غلاهـم فالضمايـر كسبـتـه
دايـم نباهـم فيـه لـذ ّه وترحـاب = ولا فيهم اللي بـار ساعـة جربتـه
اللـي نـزل للنـار موقـد وشبـاب = واللي يقول اخـذوا طلـي ٍ قصبتـه
واللي نزل للكيـف مولـم وصبـاب = وراع العشا شمّـر وحـز ّم حجبتـه
وعقب انتهينا جات من عنـد وهّـاب = ندرا ً مطرهـا فـي طرفنـا سكبتـه
للسيل في طرق الشواهيق مسحـاب = هاك العروق اللـي حداهـن وثبتـه
جيته وعد ّ يتـه معسـس ومرتـاب = مـن زود عشبـه ماتميّـز تربـتـه
وبأعلاه مديت النظر تحت الاهـداب = كن الحيا بأرقـاب الاطعـاس سبتـه
للصيـد فيهنّـه معشّـى وملـعـاب = وجينـاه واصطدنـاه والهـم كبـتـه
ولّى عن صـدور النشامـا وينتـاب = صدر الضعيف اللـي مربّـه عتبتـه
وإن كان رب ّ البيت كافانا الاسبـاب = مطلبـك ياناصـر حسـب ماطلبتـه