يا لله يا اللَّي فزعتك تبهج البال=ياللي ليا من ردت عسر تناله


يا رب موسى يا مصدّق لما قال=ياللي دعاك ايوب وأشفيت حاله


وأخرجت يونس عقب ما قاس الأهوال=من حوت وبحور تلاطم زلاله


انت الرقيب اللَّي بخيص بالأحوال=وعليك عقد إحبالنا و إنحلاله


تكتب لنا من خير ماشيت منزال=وتجعل لنا من حبل جودك وصاله


و تفكنا من ميلة الدهر يا مال=ومن غارة الدنيا وخافي لياله


دنياك غاراته بهن دق و إجلال=غدَّارة ما يامن الحذر جاله


تزين يوم و الصواديف عَمَّال=وتدور مثل الشمس تتلي ظلاله


كم فرقت ناس وكم ضيعت مال=من دور نوح ما تعدد فعاله


هذا وانا منها مروع و ذلال=اخاف من حيلاتها وإحتياله


يا ليت لو تعطينا الايام بمهال=والقلب يسكن عن هواجيس باله


اللَّه من قلب من الهم مشتال=شيل الجمال اللي ثقال حماله


والله يا لولا الصبر لاسير بهبال=وامشي كما المذِهب واسال بسواله


من واهج بين المعاليق يجتال=كنَّه على جمر يزيد إشتعاله


واللي بالي يا بو ممدوح ما ظال=علت الطريق و عيلة البيت عاله


زعمت ثري الزعم راعيه فشال=يصبح كما الساري بداجي لياله


واللي ارضعتنا الديد حولين بأكمال=حق برفقتنا يطيب الهوى له


كيف اتركه لاعند عم ولا خال=يمضي شهر ما دري عن اللي جراله


وان قيل ذا حق فانا اقول بطال=عند الجليل و من يحب الجلاله


الوالدين حقوقهم كبر الأجبال=ومن باعهم بالغير وا عزتا له


وراه من يمهل ولا يهمل اهمال=لا بد ما يجزاه باشين عماله


والدار ما تنهض بلا مال ورجال=نهضه وعزَّه من معزة رجاله


ولو ان قلبي يشدهي درب الانذال=كان استهنت النفس و ادنات ماله


أحط له بين الحبيبات مقيال=و أقول ضحك الناس ما ني بحاله


لا كن قلبي ياملا فيه ولوال=يهوم هوم اللي بعيد محاله


كنَّه بشمس والمخاليق بظلال=والنَّاس ما تدري عن اللي طراله


يا داير العليا تره صبر و إجزال=تصعب على اللي شوفته قدّ حاله


وعمر يمضى ما درك النعم لاطال=اطلب عسى المولى يعجل زواله


تمت وصلوا عدّ ما هل همَّال=او ما لمع برق و سوَّد خِيَاله

الشاعر/خالدبن محارب المشيط

---

hggi lk rgf hgil