أطلع تبين ليه عنا تخفيت=انا ادري أن قلبك مثل قلب صدام
حرام شخص ن مثلكم يفتل البيت=يقعد ضحيه بين صافي وعزام

يا ناشد ن عني عسى ما تعنيت=بعطيك مؤجز عن حياتي وملام
انا العليل الي عن الشعر صديت=مليت من نظمه ومليت الاوهام
مليت من لعب الطواريق مليت=مليت شوف البوك مليت الاقلام
حلفت قبل اسنين مكتب ولا بيت=واليوم دار الحول ما جاني ألهام
ياما على المسحوب بصوت جريت=وياما على المنكوس رزيت الاعلام
وياما بصوتي للهجيني تغنيت=وياما على البحر الطويل أنصب خيام
كتبت لي ديوان باسمه تسميت=الاسم خالد واللقب صار عزام
ما قد قراء الديوان حتى هل البيت=ما بين عيني والورق خط الابهام
على حساب الشعر ما قد تمنيت=مداني الشهره ولا حب الاعلام
أدله مع العالم وأضني تسليت=وأضحك وانا خاشرت بالحزن الإيتام
تدري وش المقصود ياعالي الصيت=يقولها اللي قد تولته الاحلام
قفيت عن طرد الرعابيب قفيت=سكر على قلبي يقيني بالاسلام
اليا شلع بصوت مضحي توضيت=وسجيت للمسجد مع الذكر الاقدام
ورميت همي خلف ظهري وصليت=فرض ن كتبه الله على كل الانام
عرفتني ولا لهألحين موحيت؟=أنا فقيد الشعر من ذخر غنام