يالربع وين ذياب ماعاد شفناه = ادعو معي ياجعل ربي يجيـبه
الايادخـــلناالمنتــدى قـبل نلقاه = واليوم ماندري وش الي مصيبه
امــا زعـــل ولا زمـــانــه تقفاه = ولا حداه الســيل يــم الجـذيبه
لكن ملــه حـيـلــتن لا عــدمناه = يفزع ومال الصاحب الاصحيبه
رفيقنا لن صار طيـــب فقــدناه = هـاذي عوايـدنا ولاهي غــريبه
ولا الــردي ياجـعل بقعا تــوطاه = تسحق محاصيله وتردي نصيبه

الضامي اللي هيض القلب بغناه = يجر صوته باللحون العجيبه
فالمنتدى يبحث من اقصاه لادناه = ينشد ولكن ماش حي يجيبه
يقول بن غانم تقافت مطاياه = وش الذي عن دارنا منتحيبه
ولاهي غريبه جعل الانذال تفداه = حرصه على الغيّاب من زود طيبه
على الوفا والعز ساسه ومبداه = ولانلحق الاجواد شكٍ وريبه
وشرواه لو طال الزمن مانسيناه = يطري علينا كل يومن نغيبه
واليا دعانا راعي الجود جيناه = ننصاه لو ان المسافه تعيبه
مثله عسى سهوم المنايا تعداه = والا الردي عسى المنايا تصيبه
المشكله فاللي هدم مابينناه = وماله ورانا مطلبن يدعيبه
ارفا خماله لين بانت نواياه = واقفيت قبل اناقشه وابتليبه
ماناقشه لاجل الجماعه ولااشناه = ولو سبني مبدي على الناس عيبه
اصد عن دربه وشوفه وطرياه = على الشرف ماهيب والله غليبه
ماني سفيهن شرهة الربع تخفاه = ادناة كلمه من طرفهم تجيبه
يجهل مشاريه الرجال وتعداه = وان ضاق صدره ردها في قريبه
يشب ضوه ميت النار واطفاه = ولاعاد له بين الصناديد هيبه
يركض ورا الشيطان لين انه اغواه = بالذل والحقران حدّر شعيبه
ويعد نفسه من هل العز والجاه = وهو مايعرفه غير حضرة نسيبه
يبا المراجل مير ماهيب وياه = ومع النشاما ماكسب غير خيبه
مفلس من الثنتين دينه ودنياه = ويمناه عن كسب المراجل عطيبه
والباب من يم المنافق قفلناه = مامن وراه الا نميمه وغيبه
يالله عساها هفّة مقاط ورشاه = فرقاه عيد وقرب مثله مصيبه
احرص على الطيب وشده بيمناه = ومن لايعدك مكسبه وش تبي به
والعد يالضامي حيامٍ ضماياه = نشّف لهيب القيض جمّة قليبه
شدّو قطينه عقب ماصار مضماه = ولاعاد توحي غير نبحة كليبه
لكن باقي واحدن ماذكرناه = قرمٍ على روس العدا ينعديبه
من شاف عبدالله عسى الرب يرعاه = عساه حصل ياجماعه ذهيبه
اتلى العهد به طش ثوبه وخلاه = ماوحيتله طاري عقب شق جيبه
قالولي انه صادق الود عنّاه = ومن شافت عيونه شكاله حبيبه
ولافيه رجمن معتلي غير عدّاه = واقعا مكان الذيب واقنب قنيبه
كانه على حاله نبا ندور دواه = ويمكن يموت ولالقينا طبيبه
ولو اني اعرف صاحبه واتولاه = لاطوعه بالطيب والا الغصيبه
وانا مالومه لو تغربل بدنياه = واللي يلومه جعل ربي حسيبه
كم واحدن ورّاه خله جفيّاه = يقوله اللي فالهوا قد غديبه