يابو ( غنى ) لو يصبح القلب محفوف=باخطار حبه ماتعلق وسُرّا
واللي حصل للهاشمي ياولد حوف =انه من الاسنة البشر ماتدرّا
تدري . ياذخر ابوي ماني بمشغـوف=ولا فيه شيٍ فالهوى يـنتطرّا
طيب ومتعافي لو الحال مرشوف=عبدالعزيز اليا تكرمت برّا
خلني ابعثر ما بقالي من حروف=واشرح عنا قلبٍ منوّل مجرّا
ياللي تركت محبك العالم صفوف=اللي يناظر فيّ واللي يورّا
ماكن جداني هل رماح وسيوف=ياصاحبي كلٍ عليه تجرّا
هذا يـتعدا كن ماني بـمعروف=وهذاك الاقـــرب مار مني تبرّا
واللي مـنوّل كنه انسان مألوف=اليوم دبّل مع عدوي وثرّا
يـخزرني بعينه ولا كنه يشوف=وازيدك من الشعر بيت يتزرّا
انـا الملوم اللي من العام ملهوف=ولاّ انت يامـشقي حياتي مبرّا
اللي دخله البرد لا يلبس الصوف=يطلع بعز شباط لو هو معرّا
يـوم ان برده هب سوٍ وشاخوف=مفروض اوقف وانتبه واتذرّا
وريته اعضم حب في قسوة ضروف=وتدرون عاد معذبي ويش ورّا ؟
وراني التجريح والجوع والخوف=والهجر والحرمان وهلُم جرّا
الحب مثل النيل والعالم وقوف=اللي روى وارتاح واللي مورّا
واللي سرى مع خلٍ ابعد من الشوف=واللي عن الخل الـقريب مسرّا
صاحبك عقبك صار مزنت ومكفوف=وعلى المواجع والقساوة تضرّا
معاد اميّز واعدم الضلع شرشوف=وجيبي من صدوف الليالي تفرّا
لا من تـيّار الهوى لافني لوف=اخاف اشق الثوب ولاّ اتعرّا
اصبحت من فعلك مكـبّل ومكتوف=ماكن قلبي للصعيبة مضرّا
خليتني من جور الايام مكسوف=مغـير اناظر صورتي واتمرّا
اسـج في جو التفاكير واطوف=وازريت لا القى في مكاني مقرّا
اطرح واقسّم واضرب آحاد ولوف=وانضر شمال المملكة واتحرّا
يمكن يجي من كامل الزين ملقوف=والضاهر ان مـحــداً لـطــاريّ طـــرّا
رحلت مدري وش معك داخل الجوف=وانا قد ارسلت الك ضرفٍ مغرّا
تعبت .. لو ماني على الخلق مكلوف=امّا سرت ولاّ عسى ماتسرّا