هذا الزمن ياحمود مسرع وعجلان = في سرعته مثل انطلاق الرصاصة
لاشك ما يلحق على شغله انسان= والكل منا منشغل فاختصاصه
ليت القلوب الها قفولن وبيبان = من اجل ما يحتلها أهل اللصاصه
شواهد التاريخ تشرح للإنسان = واعمى البصيره في مسيره حياصه
تبقى لنا الذكرى على مر الأزمان = بس الحظيظ الي سريعن قصاصه
اقولها والقلب تملاه الأشجان = وشلون يالابرص تدّس البراصه
لابد تظهر لك مواريه وتبان= وبعض البشر يمكن تجيد اقتناصه
ياقلب هوّد من تذكرك بادمان = الي بخده من حمار الاجاصه
يختال فيك بصورةٍ كلها ألوان = ويجري معك والدم يهوى امتصاصه
ادعج ليا اطرق لك بمدعوج الأعيان = الروح ما تقدر هواه ومناصه
أغيب في غيّه من الشوق ولهان = وارجع الى رشده وادور خلاصه
معذور لو عبرت للود بألحان = قبلي من أهل الطيب مليون غاصه
اجدادنا من قبل تُروي شبا الزان = ويصيدها الظبي بشخوص اوشخاصه
أهل الفعول و فالملمات شجعان = مثل المحيط المستحيل انتقاصه
على العدى وابل صواعق وبركان= وللموالي مثل تمر الخلاصه
هذا وانا شاعر واعبر للأذهان = قنَاص شعر وللمعاني قناصه
لا قلت ما قالوا لي الناس غلطان = اجيب من فيض المعاني خلاصه
شعري شعور ...ولا شريته بالأثمان = ولا ان بعض الشعر زور ونقاصه
راع الشعر معروف والشعر وديان = وراع الحطب يعرف مكان الفراصه
كم واحدن شعره قوافي مع اوزان = وماله بمسبوك المعاني بخاصه
الله يخلي اهل الوفا واهل الاحسان = الموثره لو كان فيها خصاصه
واذا بلنّك غبر الأيام بفلان = مغسول وجه وقام ينشر مواصه
فاصبر عليه وقفّ عنّه بسفهان = خلك بباصك وابن عمك بباصه
بعض العرب من نوع ناقة عريمان = اما برك ولا سريع املاصه
يعطيك من ذوب العسل لذة لسان = ويمرج مريج مذيرات القناصه