ياحشر بن جهجاه والوقــت محتــاس=الصبــح جايـــر والليـالــي عنيــده
صرنا كما الخولان في وسط محماس=ومن تحتنا جمــر الحيــاة الوقيــده
تضرب مشاكلها على مفرق الــراس=تفتل مـن الاحزان والضيــق قيــده
ضاقت مخارجها علـى طيـب النــاس=الحــر تطمــع بـه فـروخ الجريــده
والبوم قرنس صــار للصيــد قرنــاس=يـفـرس ولا يلقــا طـيـور تـحـيــده
دنيـــا تسـوقنــا علــى كــل بــلاس=اللي من الهزلات والضعف صيده
والا الرجل يبقا على طول الارماس=طيـب ووفاء علمه ينومس بديـده
يفنا ولايمشي على درب الانجاس=لو الزمـن يرخـي عليـه الحديــده
مايرتدي ثـوب المذلــة والاتعـــاس=يـبقـا قـوي البـاس مأحـد يكيــده
والمدح مايغنـي ردييــن وانجــاس=من يجمع المعلوق ضيع رصيــده
اخذ الكتاب اللي حروفه من الماس=وعطني جوابك في عقود فريـده
جر القلم واكتب على كل قرطاس=واشرح عن الماضي علوم وكيده
بذاك الزمان اللي للاجواد نومـاس=في فعلهم تفخر بيوت القصيــده
تزها فعايلهم على قــب الافـراس=ويسعون بالدنيـا ولوهـي زهيــده
دنيا حلاويها على كــف الاخمـاس=يعرف بـها الخايب ويعرف عقيــده
فيها الردي ماله من الطيب مفراس=والا الرجل لـو راح يصبــح فقيــده