من كثر ما تثّـر علـيّ الهواجيـس=احسّ كنّـي فـي زمانـي خـلاوي
وآسج لي في صحصح مابعد ديـس= ثم رحت اجرّ الصوت كنّي هـواوي
الهم جمله , من مشاعر وأحاسيـس=يشعر بها اللي من عنا الوقت راوي
يا لله يا محـي ّ العظـام المراميـس=انا تحت عفـوك وعطفـك رجـاوي
القلب من تحت الضلوع المقاويـس= يلويه مـن مـده مـن الهـم لاوي
يا فارج ٍ كرب الضعوف المحابيـس= أفرج على القلب الحزيـن العنـاوي
الناس مابين الـ(كفو) و (الهداريس)=مافيه احد صدره من الهـم خـاوي
وانا ليـا جتنـي همـوم وكوابيـس=مانيب عن كيفيّـة الصبـر غـاوي
ولا اشكي على ناس ٍ طفاراً مفاليس=اشكي لمن تسنـد عليـه الشكـاوي
ولو ما ملكت كنوز كسرى وبلقيـس=عن غير ربي في حياتـي غنـاوي
واتعب لخـوة كاسبيـن النواميـس=وانحاش عن خـوة رديّ الهقـاوي