مرحوم ياللي كل ما مر ذكراه=هلّت من اقصاها عليه الدموعي
أبوي موق العين لجله نثر ماه=وبكيت لين بكاي صرم ظلوعي
ويلاه من وقتٍ بلياه ويلاه=ياليتني ما عشت يوم الربوعي
وياليتني ميت معه موت والقاه=وأسال عنه يوم الجنايز جموعي
وأقول من شاف ابلج الوجه حلياه=شيخٍ طبوعه من خيار الطبوعي
وجيته وبست رجوله الطهر ويداه=ثم قلت له يابوي ماني قطوعي
تركتني ماني بخايف من عداه=ولاني عن الطالات رجلٍ قنوعي
يابوي عقبك جبت حالي اقصاه=وسديت عقبك جوع بيتك وجوعي
وكم مجلسِ عمّر ودارٍ بنيناه=غصبٍ على الدنيا ولا هو بطوعي
وفتحت باب العز والمال والجاه=وطلعت يوم الله فزع في طلوعي
لكن لو تدري عن الجرح ودماه=واللي بوسط القلب زاد الوجوعي
ولدك والله ما تهنى بدنياه=ولا ذاق للدنيا طعم لو سبوعي
فاقد عزيزٍ يضحك الكون بشفاه=وهذي سبايب يا عزيزي رجوعي