بسم الله الرحمن الرحيم

القلب من مجرى الزمن صار مدهوش
واتعبته الايام واونس تعبها
كنه على وهاج جمر الغضا يغوش
تصلاه نيرانن ضلوعي حطبها
دايم هواجيسه طوابير وجيوش
احترت فيها و في رضاها وغضبها
وانا نصحته قلت يا قلب لا تشوش
هذا عنا الدنيا وهذا نشبها
مرن تبين سنها ومرن تهوش
ومرن تزين ومر تفتل شنبها
والوقت صافي يوم وايام مغشوش
دنياك ماعرف راسها من ذنبها
ودرب الفتى ماهوب بالورد مفروش
إتغلبه الايام ولا غلبها
ناسن يحوش المرجلة حظها حوش
وناسن تموت وحظها ماجلبها
واحدن تعب من شان يحصل على قروش
واحدن لقاله لعبتن ثم لعبها
وناسن تعاني والزمن ناشها نوش
وناسن بحرف الواو تاخذ طلبها
والطيب فاهل الطيب ثابت ومنقوش
نقش الكتابة من يد اللي كتبها
وراس الظبي قد قيل ما فيه عرموش
والفرق شاسع فالفعول وعربها
الفرق شاسع بين عبدالله وبوش
عبدالله الي كل طاله كسبها
وليا هرج تنصت له اسود ووحوش
ساس الملوك اللي عريبن نسبها
يعيش ابو متعب وحنا له جيوش
دون الوطن وارواحنا في طلبها
وختامها تحيه من بناخي الكوش
للي قرا الابيات لو ما رغبها