يا اهل النضا عندي لكم حق واكرام=ماعوق ياهل مردومـات البراجيـم
عندي على وقت الرخا سبعة أيـام=حق عليكم شرع من غيـر تلزيـم
والى فرغت من الكواغد والاقـلام=قربت من عدلات الابيـات تنظيـم
حوفوا عليهن يامدابيـس الاظـلام=وحطوا مغابيـب التوابـع مقاديـم
الى زمن تحت الشفـق تقـل دوام=مستتبعات مثـل حـذف المراجيـم
جعل الظلام خـلاف والنـور قـدام=والعز قدم نحورهن نشـر ومقيـم
عقب الصلف والسهر والكاف واللام=مصباحهن محنونيات كمـا الجيـم
في ديرة عمرت على دين الاسـلام=ديـرة معفـي جالهـا بالمـلازيـم
حضرت عمر مرغي ضديده الى قام=فكـاك حيـلات الرجـال المعاجيـم
والـى نطحكـم للمعازيـب عـزام=تـعـذروه ولا عليـكـم مثالـيـم
يلفن تركـي دام عـزه وهـو دام=حامي عقاب الخيل عنـد المهازيـم
مفراص ماص بالمواجيـب جـزام=والى انتوى يلقح بالاريـا معاقيـم
ماقيل عن ضده تغاضـي ولا نـام=ضيم لصكات العـدى مابعـد ضيـم
لاحل من رد البرى نقض واحكـام=يسهر بما يتلف ضديده وهـو نيـم
مهدي جواده بين جالـب وسـوام=يطلع الى قلـت رجـال المواسيـم
مع سربـة سنـا المـوت بزحـام=معتصبه مثـل الجمـال المخازيـم
ذروة محصن مشبعـة كـل حـوام=الى نهضوا مثل الحرار الصواريـم
ضديدهم من باب صنعا الى الشـام=يشرب كدره امصبرينه على الضيم
سلم عليهم عد ما افطر ومن صـام=ومن شاهد الكعبـه بحـل وتحريـم
وان سايلوكم قولوا اني مـن العـام=مستدخـل لـي علـة مالهـا تيـم
الجسم منـي ناشـف تقـل دمـدام=ومدافـع وقتـي بحيلـه وتنجـيـم
والـى دريتـوا يامغذيـة الايتـام=عن علتي مالـي عليكـم مراسيـم
واقروا سلامي وابلغوه بـن رسـام=ومسلط وكفه عن وجيـه الجعاميـم
اللي مقابلهـم وجـع كبـد وهيـام=وفي غرة المخلوق مثل المحاجيـم
والا ترى الطيـب تعـداه الاوهـام=مقل القمر مايختفي من ورا الغيـم
واتلى كلامي يابـن فيحـان بختـام=باشرف تحيه من شكالـك وتسليـم
ياشوق غرو رودع الخـد بوشـام=ناب الردايف والخواصر مهاضيـم
حظي تعرض له صواديف والطـام=والفعـل نيـه والعمـل بالخواتيـم
فعل الشقا مكتـوب والحـب سـام=ثنتين للمشرى وستة عشـر ميـم
هبـي بريحـه ياذعاذيـع الانسـام=من يمة المغرب حلـول المجاهيـم
هذا وصلى الله على سيـد الانـام=مارفرف البارق وما هلهـل الغيـم