سر ياقلم واكتب على بيض الأوراق=غرايبً من محكمات الصناديق
يختار صاحبهن من الشعر مالاق=مثل الورود اليانعات المفاتيق
من خاطر من غفلته تو مافاق =وعاف الزمان اللي يبوق المواثيق
ولا عاد فيه الناس تمشي بميثاق=ولا عاد بين العدل والبُطل تفريق
والناس صاروا فيه حايز ودفاق=وصار الضعيف ضحيةٍ للتفافيق
وتحطمت فيه المكارم والأخلاق=ولا عاد في مكره بالاجواد تفريق
فيه النسا يمشن عرايا بالأسواق=والمسلمين يقلدون الزناديق
يالله ياللي نرتجي منك الأرزاق=ياكاشف الكربات يافارج الضيق
يارافع سبع السماوات الأطباق=ومرسي أراضي بالجبال الشواهيق
يامرسل عيسى والأسباط وإسحاق=يامنجي عبده من أهل المجانيق
ياللي بطشت بقوم صالح هل الناق=وجعلت يوسف بالنبيين صديق
ياللي جعلت جموع الأحزاب تنعاق=ومزقتهم عن خاتم الرسل تمزيق
وجعلت نوره بين الأفاق شعاق=ياللي بعثته رحمة للمخاليق
الطف بحال اللي عليه الفظا ضاق=يسوقه الهوجاس غربً وتشريق
من كثر همٍ مرهقً فكري إرهاق=افيق منه أحيان وأحيان ماافيق
وروابعٍ تلعب بي أشكال وارناق=حطن لهن بين المعاليق اراويق
ما أنام لينً نور الفجر ينساق=سبة هواجيسٍ تحش المعاليق
مهوب من كثر الطرب وألا الاشواق=وألا غرام معلقات العشاريق
طوق علي الذنب من كل الآفاق=وروابع سدت علي الطواريق
فوقي من الأوزار من غير مااطاق=اثقل عليه من دقينات وطويق
ارجيك ترحمني إلى قيل من راق=لاصرت ماعاد استطيع ابلع الريق
لاجا الوعد والتفت الساق بالساق=وأتلى الكلام الغرغرة والتشاهيق
يالله عسانا يوم نشفات الارياق=من خلقك اللي من جهنم معاتيق
اغفر خطايانا إلى كشف عن ساق=ليا من خلقك قربوا للتحاقيق
أليا أنورت وجيه الأبرار بإشراق=من رحمة المولى وحسن التوافيق
أبهم جنان الخلد تفرح وتشتاق=ويسقون فيها من لذيذ المواذيق
يعطون مايهوون مع كاس ديهاق=ويطوف غلمان عليهم بااباريق
وكواعبٍ حور وقوارير رتاق=وأثمار وانهارٍ عليهم مدانيق
وأهل جهنم سلسلوهم بالأعناق=والكل منهم يم زنزانته سيق
يجيلهم فيها تزافير واشهاق=وطوق عليهم من جزا الذنب تطويق
شرابهم فيها حميم وغساق=وطعامهم مهلٍ يذيب المعاليق
وصلاة ربي عد مالاح براق=على النبي وعداد نبت الزماليق