طش اللحن في غبة البحر طشــــــــه=من خوف لايطلع وراء القاف راشي
اليوم بحر الشعر كلن يدشـــــــــــــــه=تسهل على العميان فيه المماشــــي
ياليت اله حارس ولا أحد(ن) يخشه=ياكود من يعرف معان النقاشــــــــي
حيث(ن) بيت الشعر خلوه عشـــــه =لافيه لاكهرب ولا به أفراشــــــــــــي
وأسبابه اللي قام يومي محشــــــــه = راعي البيوت الجائعات العطاشــــــــي
اللي اليا منه بغاء الشطر لشــــــــه = وعلى تماثيل المخاليق عاشــــــــــــي
قولوا يابو فيصل عساء الله يقشـــه = لأنه يحسب الشعر مثل القماشــــــــي
والعيب في جسمه بكفه يمشـــــــــه = حتى جعل جسمه على العيب ناشــــي
وعدوه اللي ينصحه مايغشـــــــــــه =وصديقه اللي ينفشه لين طاشـــــــــي
يطيشه ساعة وساعة يفشــــــــــه = وعلى عيونه من زمانه غطاشــــــــي

رش الورق بازكا التعابير رشـــــــــــــه = رد الجزال جزال ماهي هشاشـــــي
جاني بيوت(ن) محكمات على اشــــــه =وانا مع المعنى يزيد انتعاشــــــــــي
عياد شاف العالم المستغشــــــــــــــــــه = وانا بعد من فعلهم ضاق جاشـــــــي
اللي مثل جكساً كلام(ن) وقشــــــــــــه = واللي على اللشه مصيبه هراشــــي
واللي معه دوخه ورجه وخشــــــــــــــه = ومخه عن الادراك فيه انكماشــــــي
جند(ن) على عمياه يرثع بقشــــــــــــه =ويعد شعره من زمان النجاشـــــــــي
هذاك يمتدحه وهذا يحشـــــــــــــــــــــــه = يزرع ويحصد في تراب(ن) خفاشي
واليا نصحته كاش وابليس نشـــــــــــــه = ومن غفلته حط النصيحة هواشــــي
ابهيم بالمشعاب ودك تجشــــــــــــــــــــه = لاتحسبه عماش و الا عماشـــــــــي
وحصن المعاني صعب محد(ن) يهشه = ولايطيح وسط النار غير الفراشـي