ديــــوان الشاعر /ســـداح الغــنـــامي العــــتيـــبي - الصفحة 3

12-06-2011, 11:22 PM

#21

سعود بن منيف بن نافه

كاتب ذهبي

تاريخ التسجيل: Jun 2011

المشاركات: 2,021

معدل تقييم المستوى: 16

سعود بن منيف بن نافه is on a distinguished road

يــــتــــبع

الــكــبــر لله يــــــا كـــبـــار الـــقــــوم
ـ وأقـــداركــــم فــالـــلـــوح مــكــتــوبــه
تنحنـحـوا .. والـلـي يـطـيـح يـقــوم
ـ ويــهــز راســــه لا نــفـــض ثــوبـــه
لو كلّ من عاش .. وفنا مرحوم
ـ مــا قـــام كـــل ٍ يـحـسـب ذنـوبــه
الله يـعـيــدك يــــا صــبـــاح الــيـــوم
عــيــد وفــــرح وعــلــوم مـحـبـوبــه
فيـك الضحايـا جــات كــوم وكــوم
ـ مـن كـل حــدب وصــوب مجلـوبـه
وأكـبـر ضـحـيّـه ذبـحـهـا مـحـسـوم
ـ جت مـع ضحايـا العيـد محسوبـه
للمشنـقـه يـــا الـحـاكـم المـحـكـوم
تــنــســـاق والــنــيـــران مـشــبــوبــه
سـخــرّك ربـــيّ تـضـهـد الـمـظـلـوم
لـــكـــنّ مــــــا ســـخــــرّك لـلــتــوبــه
مـن عـاد يحقـن دمــك المسـمـوم
ـ مــــوت الـذلـيــل ونــاتــج اسـلـوبــه
يا فلول حـزب البعـث صـح النـوم
تـــنـــاوبـــوا والـــنـــوبـــه الـــنـــوبــــه
عسـاه مــن جـنـة عــدن مـحـروم
الـلــي نـهــار الـعـيـد ضــحــوّا بــــه
"""""""""""""""""""""""""""""""""""""""""""""""""" """""""""""""""

خلاص للشّعر والشعّار مالـي مـزاج
غنيّت لين القريحـه شابـت عيونهـا

كم بنت فكرٍ بعد ما أعقد عليها الزواج
طلقّتها بالثـلاث وساقـت ضعونهـا

أنتجت ديوان .. لكن وش حصيل النتاج
كلام مصفوف .. وبضاعه بكرتونهـا

ماعاد تنسام لو تعرض بسوق الحراج
لوّ أنّها غاليه من طيـب مضمونهـا

و صبيّت دم الذيابه في حلوق النعـاج
وقامت عليّ الوعول تطـوّل قرونهـا

ما أداني البهرجه والدحرجه فـالعجاج
وناس ٍ لحبّ الظهور .. تحزّم بطونهـا

كذاب من قال لي فـالشّعر فلّة حجاج
في خاطري ضيقة ٍ تمشي على هونها

أعالج الوضع وانا اللي بحاجة عـلاج
شيّبت وأحلامي السوداء على لونهـا

يا رب تستر على نفسي من الإحتيـاج
لي رغبة ٍ يستدير الحظ مـن دونهـا

"""""""""""""""""""""""""""""""""""""""""""""""""" """"""""""""

( الحبّ ) كلمة تنكتب بأربع حروف
لاشـكّ مزحومـه بأمـور ٍ كثيـره
فيها الرجاء والياس والأمن والخوف
حلقة وصل بين العشيـر وعشيـره
أليف مير أحيان ماهـوب مألـوف
تطغى عليـه المعطيـات الخطيـره
تمرّ فيه أشكال وأحـوال وظـروف
حتـى الريـاح الموسميّـه تثيـره
والله لوّ أني فيـه مانيـب مكلـوف
ما شاب راسي بين شرّه وخيـره !
"""""""""""""""""""""""""""""""""""""""""""""""""" """""""""""""""""""""""""""""""""""""""""""""" "
يــا معـنـيّ الـشـعـر مـــدري يـــا معنـيّـنـا
_ مـوهــوب والمـوهـبـه يــــا كــبــر بـلـواهــا
إليا حفظت ( المقوّل ) جيت ناصينـا
وغــيــرّت حـرفـيــن فـأوّلــهــا وفـاتــلاهــا
يـا اللـي مـن دلال خـلـق الله تقهويـنـا
عـنـدك قصـيـده عليـهـا طــول يمـنـاهـا
راحت على الباب الأيمن فوق لومينا
وسوّاقها الورع مـدري ويـن ودّاهـا !!

__________________

منتديات قبيلة الغنانيم

12-06-2011, 11:44 PM

#22

يزيد العطاوي

تاريخ التسجيل: Dec 2010

الدولة: الطايف/حايل

المشاركات: 228

معدل تقييم المستوى: 14

الله يعطيك العافية
طرح مميز لشاعر اقل ما يقال عنه نابغة الشعر الشعبي
ديوان رائع اتمنى له التوفيق
مشكور على التميز الأخاذ
تحياتي لك..

__________________

12-06-2011, 11:48 PM

#23

سعود بن منيف بن نافه

كاتب ذهبي

تاريخ التسجيل: Jun 2011

المشاركات: 2,021

معدل تقييم المستوى: 16

يـــــتــــبع

بين كشف الحضور .. وبين كشف الغياب
سجّلوني غياب .. وسجّلونـي حضـور

شايل القفل وأفتـح بـاب وأصـكّ بـاب
وين أبلقا لدرب النـور كـرت العبـور

ما تشيب المشاعر .. والمحبّـه شبـاب
ولا على الحب زود و لاعليكـم قصـور

بعض الأحيان أغنّي من دواعـي عـذاب
وبعض الأحيان أغنّي من دواعي سرور

قبل لا أجمع زهابي وأعلـن الإنسحـاب
ذعذعي يا هبوب .. و وقّعي يـا طيـور

أنتهت كذبة إبريـل .. وبـدت كذبـة آب
نكذب أربع شهور ونصدق أربع شهـور

من يحرّف كلام ٍ فـي غـلاف الكتـاب
ينتبه للكلام اللـي مـا بيـن السطـور

"""""""""""""""""""""""""""""""""""""""""""""""""" """""""""""""

أضحى نهار اليـوم مستنكـر النـور
مضفي عليه الليل .. دامس ظلامـه
كان يترنـم فيـه تغريـد عصفـور
لين أخلف الترنيـم نـوح الحمامـه
لا واهنّي اللي من الخلـق مسـرور
مـا مـرّه الطـاري وكـدّر منامـه
إلى متى يا خاطري وأنـت مكسـور
مدري متـى تستوعـب الابتسامـه
لا تحسب أنّي ميّت إحساس وشعـور
أملك مـن الإحسـاس ذروة سنامـه
دار الزمان .. وجات الأحداث بالدور
من يسقط الريّس .. ليسقـط نظامـه
واللي يجي ويروح في مشـة الـزور
علم ٍ عليه مـن الحسايـف علامـه
مقتل زعيم القاعـده والخبـر شـور
هذا ما جاء بخطاب بـراك اوبامـه !
أعلن خبر موته وصرّح على الفـور
والبيت الابيـض بشّـره بالسلامـه
قال ابن لادن مات .. والحق منصور
بمداهمـه قـدام يـربـط حـزامـه
والخاتمه فـي غبـة البحـر مقبـور
اليابسـه عيـت لا تدفـن عظامـه
ماهي لنا يـا قايـد الغـرب دستـور
للحـيّ والميّـت نصـون الكـرامـه
والصوره اللي جابها شاهـد الـزور
مزيّـفـه بالمشـلـح وبالعمـامـه
عز الله انه كـان مخطـي ومعـذور
و رغم إختلاف الراي عالـي مقامـه
منـوّخ امريكـا بشلفـا وسـاطـور
وياما غزاها فـوق ظهـر النعامـه !
واحد .. وهز جيوش طابور طابـور
لو ما تعـدّه مـن رجـال الزعامـه
جاهد طغاة الارض والحـال ميسـور
صاحب فدى .. ماهوب صاحب فخامه
عساه بالجنـه عـن النـار ماجـور
عنـد الولـي مثـواه يـوم القيامـه
أن مات أسامه .. يا هل الظلم والجور
في أمة الإسلام .. مليـون أسامـه !

"""""""""""""""""""""""""""""""""""""""""""""""""" """"""""""""""

مبروك .. وليام تزوّج كيت
زفوّا علـى كيـت وليمهـا
جاها .. معه ورده وشوكليت
_ثم حط .. قبله علـى فمهـا
حفلة زفافه شهيرة صيـت
علـى القنـوات عمّمـهـا
بثّ الفرح حيّ .. ماهو ميت
مير العـرب ليـه يعزمهـا
قوم ٍ تعاني مـن التشتيـت
يا مفـرّق النـاس ليّمهـا
الشعب ثايـر لعـل وليـت
_والأنظمـه مـن ينظمـهـا
أعلامها فوق سطح البيـت
وهمومها تضعـف هممهـا
ما عندها غير حقل الزيـت
يـا جعـل ربـي يسلمهـا
أمجادها صوره ومانشيـت
والـذل يرسـم معالمهـا !!

"""""""""""""""""""""""""""""""""""""""""""""""""" """"""""""""""""""""

طال عمرك مع طويليـن العمـار
أمشط اللحيـه ومـسّ أشنابهـا
هكذا حطوك من ضمـن الحـرار
دبّـسـوك ولبّـسـوك ثيابـهـا
سوبروك .. وجيتنا سوبر ستـار
الجـبـال العالـيـه ترقابـهـا
الحيايـا تقرصـك ليـل ونهـار
والعقـارب تنقـلـك بأذنابـهـا
غـنّ وإلاّ حـنّ وإلاّ شـب نـار
لين اقـول النـار مـن شبابهـا
لا تحاسبنـي فـي رد الإعتبـار
والخطيّـه منـك مـا نشقابـهـا
وش يحـدّك للبعاريـن الكـبـار
هجّ .. لا تضرس عليـك أنيابهـا
خلها وارتاح واللي صـار صـار
عقب راحت ما حسبـت حسابهـا
ماتعوّدنـا علـى نقـز الـجـدار
لا وصلناهـا نـطـقّ أبوابـهـا
أختمك وأحط لـك رمـز وشعـار
رح وبلّغ مـن كسبـت إعجابهـا
ما أستعرت الشعر وأسمي مستعار
والأسامـي عزهـا بأصحابـهـا

"""""""""""""""""""""""""""""""""""""""""""""""""" """""""""""""
المسنجـر حدّثـوه .. وزيّنـوه
وأقفزوا به .. قفزتين ٍ هايلـه !

كل ما يفرغ مع الوقت أشحنـوه
بالخطوط القايمـه .. والمايلـه

بالتطوّر يهدمـون اللـي بنـوه
وبـارك الله باليديـن الطايـلـه

مير يا هنّ .. أنتبه له .. لا هنوه
لا تعيـل ولا تضيـف العايـلـه

فيه ناس ٍ كـل ّ خافـي بيّنـوه
لا يورّونـك نـجـوم القايـلـه

مـا يخشّـه عاقـل إلا جننـوه
وصار رايح منه وإلا جـاي لـه

في مربع صورته يـوم أمحنـوه
بدّل الصوره .. بكرت العايلـه !

__________________

منتديات قبيلة الغنانيم

12-06-2011, 11:55 PM

#24

عيون الصقر

كاتب متميز

تاريخ التسجيل: Jan 2009

الدولة: ksa ryadh

المشاركات: 480

معدل تقييم المستوى: 16

صقر روق

أبداع x ابداع

الف شكر لك ولطرحك هذا الديوان الرائع من دكتور الشعر ابو عذبي الله يحفظه لنا هذا الانسان الرائع الذي حباه الله بمميزات وسمات راقيه اقل ما يقال عنها انها سمات كارزميه في شخص يتصف بعذوبة المعنى وسهولة الكلمات وباحساسه المرهف الذي يصل الى القلوب مباشرة.

الف شكر لك مراراً وتكراراً

تقبل مروري

__________________

مكّنتك بقلبي وعوّرت قلبي
ليتك بقلبي ما وصلت وتمكنت
أنت السبب في هم حالي وغلبــي
والضيقه اللي وسط صدري سببها أنت
كنت اتمنى ما اعرف أنســـــــــــان سلبي
أبــــــداء حياتــــــــي معْه وأرجــــــــع كما كنت

بقلمي

12-06-2011, 11:55 PM

#25

سعود بن منيف بن نافه

كاتب ذهبي

تاريخ التسجيل: Jun 2011

المشاركات: 2,021

معدل تقييم المستوى: 16

يــــتــــبــــع

ترفّق يا حبيبي في هجوس الشاعر الموهـوب
لا تربك واهسه ..ويروح قافه ضايـق ٍ بالـه
على شعر الغزل فصّلت من عذب المشاعر ثوب
على قدّه .. عساه يروق لك ثوبـه وتفصالـه
يتوّبني عن الحبّ .. الزمان ولا قدرت أتـوب
يباشرنـي مـن أفوالـه وفـال الله ولا فالـه
سرقني منك لأحداثه .. تقول أنّي معه مطلـوب
_أغنّي له مع اللي شاب راسه .. يوم غنّى لـه
يا نبع العشق سامحني ماعندي بالغرام أسلوب
لو انّ الحبّ أنا همّه .. وأنا عمّه .. وأنا خاله
لتجديد الغلا محتاج مـع قلبـي ثـلاث قلـوب
ترا قلبي ما يقـدر يكشـف المكنـون بلحالـه
تلاعبني بنظرات العيـون ويخـرج المغلـوب
وأعيد الشّوط ورمشك كل ما حط الهدف شاله !
سموّك سامي وعقلك يا ثقله لو عيونك عـوب
_لا داعبها الكحل قالت .. كلام الكحل مـا قالـه
ما ألوم العقد يوم أنّه على لبّة نحـرك يـذوب
عداه اللوم لـو أنّـه مـن الفـولاذ سلسالـه
أحبّك يا فريـد القلـب والقالـب وحبّـك دوب
تربّع فـي مداهيـل الضلـوع ونـوّخ جمالـه
تغيب وتمتلي عيني من أنواع السهر وتـروب
وتصبح ناشفـه والشّـوق مشقيهـا بموالـه
طيوفك كم تحاصر ناظري من كلّ حدب وصوب
أنا بالمختصر لا غبت عنّي .. حالتـي حالـه !
"""""""""""""""""""""""""""""""""""""""""""""""""" """""""""""""""""""

شلة ٍ من عرض يا عالم .. يا هوه
ما جهلنـا وش يبـون وش نبـي
عارضوا وجه القصيـد وشوّهـوه
_يسرقون الكحل من عين الضبي !
دوّرا من يلحـس الريـح ولقـوه
بـارد الهمّـه عريـض المنكبـي
أفتحـوا بنـد الأجـور وأجّــروه
ولبسّوه مـن المشالـح والعبـي
كلّبـووهـم يدفعـونـه كلّـبـوه
_وغنّ يا روحي .. وغاية مطلبـي
فالخطـوط المستديـره لولـبـوه
_وجـاك كلّـه مستديـر ولولبـي
وش تقول أفواههم يـوم أمدحـوه
النفاق يسـاق والكـذب أحلبـي !
عقـب حطـوّه متنبّـي وأنفخـوه
_يـا الله أستـر لا يحطّونـه نبـي
قال يـوم انـه تحيـزم وأدفعـوه
_خلّوا الإبـداع فـي سـد أشنبـي
وعقب فضفض فالقصيده فضّ فوه
وشلّعت عظمة لسان اليعربـي !!
والنتيجـه فالنشايـب ورّطــووه
_شاعر ٍ معتـوه وجمهـوره غبـي
الشعر خلـوّه بيـن أمّـه وأبـوه
المواهب من متـى توخـذ سبـي

"""""""""""""""""""""""""""""""""""""""""""""""""" """"""""""""""""""

أسلوبك فـي سـرد القصّـه

أسلـوب البنـت المختصّـه

من فمـك اللهجـه ورديّـه

متصلّـه ماهـي منقـصّـه

قلبي .. روحي .. نور عيوني

مفـردات إكمـال الـرصّـه

جيتي وعيونك تضحـك لـي

ورحتـي بالعبـره منغصّـه

حلّي عن عينـي وارتاحـي

يا نوره مـدري يـا حصّـه

والله لـو أنّـك مملـوحـه

ملح علومـك ذايـب فصّـه

وقلبي ما يرخص لـك دمّـه

ولا كـل ٍ يقـدر يمتـصّـه

والحـبّ أمـيّـز قانـونـه

وأعرف شرطيّه من لصّـه !

لا أوحيتـي كلامـي كـلّـه

هاتي نصّـه وأخـذي نصّـه

"""""""""""""""""""""""""""""""""""""""""""""""""" """"""""""""""""""
صحّ بوحك كن بخيـر
والبـدو شـوف بدالهـا
تصحى على سمن ومضير
والـدلـه وفنجـالـهـا
من الحصان اليا البعيـر
عاشت مابيـن أمثالهـا
وألاّ انت عمك شكسبيـر
وأمك .. نيوتـن خالهـا
تناثر شموسـك عصيـر
لين اضمحـل ارسالهـا !
وتساقـط ابداعـك مثيـر
يهنى لـك ويهنـى لهـا
صح الجنون اللي يطيـر
حـط العقـول وشالهـا
أهطل و يا لك من خطيـر
ومنـك القصايـد يالهـا
بقايـط الجيـل الاخـيـر
فــال الله ولافالـهـا !

"""""""""""""""""""""""""""""""""""""""""""""""""" """"""""""""""""""""""

يا حبّنـي لـك .. وأنـت غالـي ودلـوّع
كـــبّ التـغـلّـي .. والـدّلــع لا تـكـبّــه

منك الدلع مسمـوح ماهـوب ممنـوع
يـلـوق لــك .. وتـلـوق مـعـك المـحـبّـه

الله عطاك أنفاس وإحساس وطبوع
و فيـك الـحـلا سبـحـان ربّــي وربّــه

تفرق عن الخفـرات بالشّكـل والنـوع
لــو فـيـك ربّـــات المـفـاتـن تـشـبّـه !

حبّـك نـزل فـي قلبـي ولاعنـي لــوع
قـام يتسلقـط فيـه .. حتـى نشـبّ بــه

تقول ينبـت لـي مـع ضلوعـي ضلـوع
لا شـفــت زولـــك والهـبـايـب تـهـبّــه

لعيونـك النعـاّس مـيّـت مــن الـجـوع
مـتـى تـحـسّ ومــن يحـبّـك .. تحـبّـه

زوّدتـهـا حـبّـه .. مـثـل حـبّـة الـكـوع
وعلـيـك شـوقـي زاد تسـعـيـن حـبّــه

وأصبحت أنا وياك طامـع ومطمـوع
لـبّ النـدا .. يــا جــرح قلـبـي وطـبّـه

أقابلـك ساعـه مــن سـبـوع لسـبـوع
مــوقّــتــه وضــروفــنــا مـسـتـتـبّــه

علـى بدايتهـا .. شـذى ورد وشـمـوع
وعـلــى نهايـتـهـا .. يـــدقّ المـنـبّـه !

__________________

منتديات قبيلة الغنانيم

12-07-2011, 12:00 AM

#26

سعود بن منيف بن نافه

كاتب ذهبي

تاريخ التسجيل: Jun 2011

المشاركات: 2,021

معدل تقييم المستوى: 16

وقـــفـــــــات

"""""""""""""""""""""""""""""""""""""""""""""""""" """""""""""""""""

أنا لي ثلاث أيام أهرول على الكورنيـش ** بكبـوّس مستـورد وبـدلـه رياضـيّـه
لو اني بفضل الله بعيـد ٍ عـن التكريـش ** ولا بي مـن السمنـه علامـه وماريّـه
لاشكّ بدوي مدمن على أكل اللحم والعيش ** ولبن خاثر .. وحبحب .. وفنجـال بريّـه
أحبّ أتمشى لا دخـل خاطـري تشويـش ** وأهجرس على مبـدا قصيـدة سياسيّـه
لكنّ البـلا قـام يتزايـد ولا ادري ليـش ** في ( خط المشاه ) الوضع حاجه خياليّـه
صبايا حياهن في سماهن يهـزّ الريـش ** على الشورت وانـواع البناطيـل مبليّـه
تسوق التفاخر والتباهـي علـى مافيـش ** في عمـر الزهـور ومفعمـه بالحيويّـه
هاذي تعلك العلك .. وهاذي تنفش النفيّش ** يا طيب السلامـه بيـن هـاذي وهاذيّـه
وانا من صغر سنيّ حياوي ما أحب الطيش ** ( أحب الحيا واهـل القلـوب الحياويّـه )
ماغير أتمثناهن وأسوق القـدم بشويـش ** ولا أرفع نظر عيني عـن أقـدام رجليّـه

"""""""""""""""""""""""""""""""""""""""""""""""""" """""""""""""""""

لا يا بعد من تعرف الشـوق والغيـره
و الضحك والفرفشه والضيق والحرّه !
كلامهـا تختلـط عـنـدي تعابـيـره
بالجابه الحلـوه .. وبالجابه الـمـرّه
والشـكّ لا مرّهـا صفـرّ بصفـيـرّه
وقامت على جرّتـه تستلحـق الجـرّه
الله لاينعـم عليـه ولا كثـر خـيـره
ليتـه يكافـي وذاه وخيـره وشــرّه
خايف على ضغطها لا يرفـع امبيـره
ويرجع على قلبها يضغط علـى زرّه !
ويآخذ علـى شوقهـا لفّـه وتدويـره
وتاريخـي المعتمـد تنسـاه بالـمـرّه
لو أن حسن السلـوك يجمّـل السيـره
ماكان بيـن الحبايـب جـات مفتـرّه
نمسي وغصن الغلا تلعـب عصافيـره
ونصبح على ملاكمه ومصارعه حرّه !!

"""""""""""""""""""""""""""وقــفات"""""""""""""""" """"""""""""""""""""""
الطرقي المشفوح منعاً للاحـراج
مالك عليّه غير ضحكـة سنونـي
بيني وبينـك حـد ممتـدّ وسيـاج
ولا كل من يقرب حمانـا يمونـي
عليك أفلّ حجـاج وأعقّـد حجـاج
كيفي وانا ابخص في حواجب عيوني

كمية الحـب محـدوده
وأنتي لحالـك خذيتهـا
والقلب لو ضاع مجهوده
يموت ماقـال هاتيهـا

من يمنعك والحب ماهوب ممنوع
حب وتعلق فـالسلـوك الدقاقـه

عليك باللي عينها عين جربـوع
وانحش عن اللي عينها عين ناقه

موهوب وإلاّ وارث .. اللون لوني
ـــــــــــــــــــ خليط بيـن الموهبـه والوراثـه
يكفي رجال المعرفـه صنّفونـي
ـــــــــــــــــــــ شاعر حدث مانيب شاعر حداثـه

""""""""""""""""""""""""""""""""""""""""

عندي ماسنجر على الهوت ميل
ـــــــ عليـه الأجــواد مضيـوفـه
أستذكـره جملـه وتفصـيـل
ـــــــ وأغليـه وأقــدّر ضيـوفـه
مـا تقبـل حروفـه التظليـل
ـــــــ ميـر الدبـا دبّ بحـروفـه !
نفسي مع اللـي يعـدل الميـل
ـــــــ ولاهيـب بالغـيـر مكلـوفـه
إسـم ٍ حظرتـه علـى ماقيـل
ـــــــ وألحقتـه أسميـن محـذوفـه
وقـام التطـوّر يـرزّ الذيـل
ـــــــ والنـتّ مـن يآمـن صدوفـه
القـرد بالـفـرد والدربـيـل
ـــــــ ينقـز ورا البـاب ويحـوفـه
ساق الهكر فوق ظهـر الفيـل
ـــــــ وقـدّم جميـلـه ومعـروفـه
لعيـون باشـة بنـات الجيـل
ـــــــ شمطـاء وعميـا وملقـوفـه
تشبك على النت ّ صبح وليـل
ـــــــ ورموشهـا السـود منتـوفـه
تهوى القصيد وركوب الخيـل
ـــــــ ولا تلحـق المقفـي أحسوفـه
ما تسبح ألاّ فـي نهـر النيـل
ـــــــ لو جدّهـا مـن هـل الكوفـه
قولوا لهـا لـو تشـدّ الحيـل
ـــــــ تعيـش وتـمـوت ملهـوفـه
وان ولّـع براسهـا قنـديـل
ـــــــ براسهـا تضـرب الطوفـه !!

"""""""""""""""""""""""""""""""""""""""""""""""""" """""""
دايم ضحايا الحرب في كلّ الأوطان
ـــــــــ ما هم من القـادات ف الجانبيـي

دوّر وتلقاهـم عجايـز وشيبـان
ـــــــــ وأطفال رضّع ما لهم مرضعينـي

صاروا على درب الصواريخ نيشان
ـــــــــ طاحت عليهم من يسـار ويمينـي

والقايد اللي يعتزي عقب ما بـان
ـــــــــ عوّد على جحره سوات الحصيني !

__________________

منتديات قبيلة الغنانيم

12-07-2011, 12:06 AM

#27

سعود بن منيف بن نافه

كاتب ذهبي

تاريخ التسجيل: Jun 2011

المشاركات: 2,021

معدل تقييم المستوى: 16

يــــــتـــــــبع

مـا ودّي أغـازل الغـزلان
ولا عاد لـي بالغـزل طاقـه
يا مباركت لي على الديـوان
شكرا ً .. وللشكّـر ميثاقـه
قافـل علـى قلبـي البيبـان
وأنتي نقزتي مـن الطاقـه !
أكافـح أسلوبـك الفـتـان
مبروم .. وسلوكـه دقاقـه
يتلّـنـي تـلّـة النشـطـان
والصمت واقف على ساقـه
أقصّر السالفـه مـن شـان
الوصل مـا تثمـر أوراقـه
لا قلتي أبو الحصان .. حصان
أقـول وأم الجمـل .. ناقـه
أخاف من خافـي ٍ مـا بـان
يحـوف قلبـي ويستاقـه !

"""""""""""""""""""""""""""""""""""""""""""""""""" """"""""""""""
لا تنشديني ليه ما أحبّ ألتفت يمّـك يـا ريـم

صدّي وخليّ شرهـة عيونـي علـى حجّانهـا

هل تعلمين أنّ الهوى نوعيـن شـدّاد ومقيـم
وأن المحبّـه تختلـف بأشكالهـا وألوانـهـا

ما ترجف قلوب الرجال .. إلاّ من عيون الحريم
ـ هـاذي طبيعـة والطبيعـة ثابـت ٍ برهانهـا

والله خلق صدري عوج ضلعه وقلبي مستقيـم
وأخـاف ربـيّ والذنـوب مشمّـره ذرعانهـا

شاعر لكنّي مالقيت الوادي اللـي فيـه أهيـم
عيّت لا تفتح لـي شواعيـر النبـط وديانهـا

أشرفت في راس الجبل وأسرفت من شمّ النسيم
ما فيه هبّة ريح مـا جـرّت علـيّ ألحانهـا !

"""""""""""""""""""""""""""""""""""""""""""""""""" """""""""""""""

يا حبّكـم للهرج والمـرج
ما تتعبون مـن الكلامـي
سوالف ٍ مضمونها حـرج
فيها الحلال مع الحرامـي
الكل منكم ينفض الخـرج
ويصيح ويدينـه توامـي
سوّا مفيض العور والعرج
مثل ما سوّا توسونامي !
هدّ الجدار وكسّـر البـرج
وشال القصور مع الخيامي
تريّحوا ما للبقـر سـرج
والثور ما فوقه سنامـي

"""""""""""""""""""""""""""""""""""""""""""""""""" """""""""""

يا كبرها كبـراه ميـر الله يعيـن

صوره ومن جاب العجايب جابهـا
الرّيـس الليبـي يـأمّ المسلميـن
هاذي هي اللي ما حسبت حسابها !
اللي يساره حطّها فـوق اليميـن
كيف العباد المسلمه صلـى ّ بهـا
ما يتبع السنّـه عشيـر الخايبيـن
لو يكسب من الخايبيـن إعجابهـا
تقـدّم وصفـوّا وراه الحاضريـن
سود الوجيه اللي بيـاض ثيابهـا
معتوه ومشعوذ ومنبـوذ ولعيـن
يومي ما بيـن القافلـه وكلابهـا
وجه العجوز اللي بلا مذهب ودين
ماهـو كفـو للّحيـه ولأشنابهـا
السيره العفنه على مـرّ السنيـن
أولا به .. وراس العقيد .. أولا بها

"""""""""""""""""""""""""""""""""""""""""""""""""" """"""""""""""""""
حبيبي حبّـه طـاروق
متعبني لحنه وإغنـاه
غنيّت الغيره والشوق
على يا لالـه لا لاه !
من راسه لأقدامه ذوق
كلّه .. يا حلوه حلواه
قلبي شاله في صندوق
ثمّ حطّه داخل مخبـاه
لكنّه عنّـي مفهـوق
تاركني يطـرد دنيـاه
عنده ماجستير حقوق
ويحضّـر للدكتـوراه
ويتابع تقرير السـوق
ويناديني واا سهمـاه
"""""""""""""""""""""""""""""""""""""""""""""""""" """""""""""""

__________________

منتديات قبيلة الغنانيم

12-07-2011, 12:23 AM

#28

سعود بن منيف بن نافه

كاتب ذهبي

تاريخ التسجيل: Jun 2011

المشاركات: 2,021

معدل تقييم المستوى: 16

يــــــــتــــــــبــــــــــع

يا وسع صدري مير للضيق مرهون
وأن ما توسّع كلّه .. يضيـق كلّـه
يمشي تحت رهن الاشاره على الهون
وترمي عليه مـن السلـوك وتتلّـه
أحيان أجامل وأترك السـدّ مدفـون
وأضحك ما بين الخطّـر المسفهلّـه
وأحيان أجي مشحون وأروح مشحون
وأقول مـن يعقـد حجاجـي يفلّـه
ثلاث تحكمني ولا قلـت وش لـون
المعـرفـه والعاطـفـه والجبـلّـه
العقل صاحي لكـن القلـب مجنـون
والكـل منهـم نظرتـه مستقـلّـه
يا صاحبـي مـا للمحبيّـن قانـون
والحـبّ لغـز ولا عرفنـا نحـلّـه
مير الغـلا لازال بالحفـظ والصـون
لكن عسـى الله مـا يغيّـر محلّـه
أهديتني جمره علـى راس غليـون
وأهديتك من العمـر شيحـه وفلّـه
ورغم اختلاف المدّ لا زلت ممنـون
والشوق يآخذنـي علـى كـل ملّـه
حتى غديت بحكـم فاتـن ومفتـون
راضي بحكم الحبّ .. والحكـم للّـه
وأن قام يكبر بيننـا شاسـع البـون
أرفق علـيّ وشاسـع البـون قلّـه
عز الله أنّ الشكّ ماهـوب مامـون
سيف الجفـا البتـار يمكـن يسلّـه
أقنع لو أنّ الحال من دون فـي دون
وأخذ الكـلام اللـي عليـه الأدلّـه
لا تشتكي لي والعرب وش يقولـون
شكـوا ً لغيـر الله تراهـا مذلّـه

""""""""""""""""""""""""""""""""""""

حسبي الله على أمريكا ونعم الوكيل

ما يشب الحرايق غير مقباسها

تحت بند العداله كم تحط وتشيل

وفتنة الشرق الأوسط من تحت راسها

بالسلاح القصير وبالسلاح الطويل

ترسم ومرسمتها فوق كراسها

مجلس الأمن كلّه يقضم الجنزبيل

ترفع الفيتو ولا يجرح إحساسها

يا الله انك تسلّط فوقها شهب ليل

لين تهدم معالمها على ناسها

والعرب يفتح الله والحصيل الحصيل

ما لعب في الخزينه غير حراسها

أحفظوها مثل لايق وجاله دليل

طابخة فاسها تشرب مرق فاسها

"""""""""""""""""""""""""""""""""""""

اللي ثلاث أيام فـي قسم الأطفال
لا يآقف الدكتور بينـي وبينــه

على سريـره كـل ما شافني قال

بابا .. وسال الدمع من نون عينه

أجيه وفي قلبي من الضيق سلال

وأمسح على راسه وأقبّل جبينـه

يوّن ما يدري وش اللي برا الحال

وسلك المغذيّ ناشب ٍ في يمينـه

أبكي معه بسكات والدمع همـال

الله يطمنيّ عليـه .. ويعــينه

طالبك يا منزل تبارك والأنفـال

تضفي عليه العافيه والسكينـه

"""""""""""""""""""""""""""""""""""""""""""""

لازال جـوالـي إستقـبـال
يا اللي من الشوق ترسل لّي
أمهلني آخر شهـر شـوّال
وألقـى لفاتورتـه حـلّـي
وأعـاود البـثّ والإرسـال
والله يخليّـك يــا خـلّـي
واليا انقطع والغـلا شغّـال
جيتك بحكـم الغـلا كلّـي

"""""""""""""""""""""""""""""""""""""""""""""""""" """""""

ياسرع دقات القلـوب المواليـف
إليـا تغشّاهـا شعـور الـمـودّه
وين انت عني يا عديم التواصيـف
أرخيت حبل الشوق وأزريت أشـدّه
والحبّ عطلّته مع عطلة الصيـف
يا شين طبع ٍ فيـك مانيـب قـدّه
ألين من الديباج وأقسى من السيف
عـز الله أنـه حالـة ٍ مستـبـدّه
"""""""""""""""""""""""""""""""""""""""""""""""""" """""""""""

لا تعلّقنـي علـى حبـل الـمـودّه

ما تعـوّدت التعلّـق ف الحبالـي !

لو نظر عينك علـى حالـي تلـدّه
كان قبل تشوف حالك .. شفت حالي

"""""""""""""""""""""""""""""""""""""""""""""""""" """""""

يا وجه الكريم اللي نسوق الدعاء يمّه

إله ٍ ولـه فـالخلـق قـدره إلهيّـه
طلبتك شفاك اللي بمقـدورك تتمّـه
بليـاّ مصحّـات وعقاقيـر طبـيّـه
على واحدٍ غالي ودمـيّ فـدا دمّـه
أودّه وله عنـدي محبّـه خصوصيّـه
بلطفك وعطفك ينجلي باسـه وهمّـه
بليته وكم غيره مـن عبـاد مبليّـه
سلامات يا وجه الرضا صافي الذمّـه
عيوني عبايرهـا تعبـرّ بمـا فيّـه

"""""""""""""""""""""""""""""""""""""""""""""""""" """""""

ياصاحبـي علّقتنـي بيـن التغلّـي والعنـاد

وأنا قنعت أن الغلا مسكين .. والحبّ أجودي !

دايم تـزلّ ولا تمـلّ وزلّتـك كبـوة جـواد
يا كثر كبوات الجواد اللي مع الخيـل إيعـدي

__________________

منتديات قبيلة الغنانيم

12-07-2011, 09:44 PM

#29

سعود بن منيف بن نافه

كاتب ذهبي

تاريخ التسجيل: Jun 2011

المشاركات: 2,021

معدل تقييم المستوى: 16

يـــــتـــــــــبـــــــــع

ما كل مزيون يعسف طبعي القاسي
كم ساد طبعي على سيد المزاييني

يا بنت خليّني أبعد وألقط أنفاسـي
وأجيب كمّام لأنفـاس المحبيّنـي

مانيب قايل لراسك .. يا بعد راسي
ولا نيب قايل لعينك .. يا بعد عيني

إلاّ ليا قام حبّك يجبـر إحساسـي
أنه يحبّك .. مثل ما أنتي تحبّيني !
"""""""""""""""""""""""""""""""""""""""""""""""""" """

تلبسون البشت .. وإلاّ تلبسـون الجبّخانـه
الثياب البيض ماهي فوق كلّ الناس زينـه !
تحرمون الصوت منيّ وأفلحوا والصوت أمانه
واعذاب المسلم اللي في رضاكم .. باع دينه

"""""""""""""""""""""""""""""""""""""""""""""" """"

قامت تفيض الأرض .. شعر وشواعير
يـارب ستـرك لا تقـوم القيـامـه

طفـرة مواهـب جاهـزه للجماهيـر
حطّوا لها أصحاب الفخامه .. فخامـه

تفجّـرت مـا عـاد تحتـاج تفجيـر
والله يعيـن مـدوّريـن السـلامـه

بخشومهـم حبـوّا خشـوم الدنانيـر
وكل ٍ رسم له فوق خشمـه علامـه

هذا يدقّ الزير .. مـع سالـم الزيـر
وهذا يغازل عيـن زرقـاء اليمامـه

راح الفضاء كلّـه حمـام وعصافيـر
وكم يفتن العصفور فاتـن حمامـه !

لا تعرضـون أحلامـنـا للتفاسـيـر
والليـل عيّـا لا يفـسّـر ظـلامـه

اللي ينام بخيـر يصبـح علـى خيـر
واللـي ينـام بشـرّ يشتـم منامـه

وأبـو عمامـه طيّرتهـا المعاصيـر
ماهوب لازم فـوق راسـه عمامـه

يمكن لا صلّع يصبح مـن المشاهيـر
وينبت في راسه مثل ريـش النعامـه

لا تشتكي لي يـا زبـون المخاسيـر
الوقـت مـا نقـدر نغيـرّ نظـامـه

ما يتبـع المنعـور غيـر المناعيـر
خـل الهلايـم يتبـعـون الهـلامـه

وأن جوك عميان البصايـر طوابيـر
أكحل كريـم العيـن وأنـت بكرامـه

وأنـا ليـا جانـي زمانـي بتكشيـر
أرمي على وجه الزمان إبتسامـه !!

"""""""""""""""""""""""""""""""""""""""""""""" """

العام بيني وبينك .. موعـد أسبوعـي

واليوم لقياك .. حلـم أبليـس فالجنّـه

حتى بعد صوتك إليـا مـرّ بسموعـي

يشبـه مـرور الكـرام ولا درت عنّـه

واللي في صدري من الأشواق مزروعي

لابدّ مـا يحتـرق مـع لاهـب الكنّـه

أسرفت و أخطيت في وضعي وموضوعي

مجنون يـوم أكثـر العشّـاق منجنّـه

مالي ومال الضما والخوف والجوعـي

والعافيـه ضافيـه والله لـه المـنّـه

"""""""""""""""""""""""""""""""""""""""""""""" ""
دار الزمـان وكبـرت الدوّيـره
ورحنا معه من جرف في دحديره
مصايبه منّـا .. وشـرّه منّـا
والخيّره تومـي لهـا الشرّيـره
لولاي أسلّي خاطـري وأغنّـي
وأقول جعل اللي نشوفه خيـره
يمديني أرمي ثوبي من هبالـي
ومع الهبـوب أصفّـر بصفّيـره
في كلّ عام يحلّ .. حلّت علّـه
أمراضنا عيّت تفـضّ السيـره
تفلوزت كـل الطيـور وطـارت
والعلم الأوّل جاك علـم ٍ غيـره
بانت خشوم ٍ دوبهـا مزكومـه
يا ويل أبو خنزير مـن خنزيـره
جاتك من المكسيك تزحف حتّـى
توزّعت من ديـره إليـا ديـره
مير أذبحوهـا لعنبـو مجناهـا
لـو حلّلوهـا شاربيـن البيـره
اللّه محرّمهـا بمحكـم قولـه
قبل المرض لا ينتشـر تقريـره
يـا ربّ تحفظنـا وتعفـو عنّـا
رحماك من وقت الشقاء والحيره
اللي بدت فيهم .. لا تبـدا فينـا
للوقت الأغبر ضربه وتمريـره
ثم عاد نبلش بالجمـل والناقـه
ولا يذبح الجمّال غيـر بعيـره ! """""""""""""""""""""""""""""""""""""""""""""""""" """""""""""""""""""""""""""""""""""""""""""""""""" """""
فرمتّ قلبي عشـان أنسـاك
وسوّيت رستارت لجروحـي

لكـنّ فيروسـك الفـتّـاك
عاد وتسلّط علـى روحـي

قام يتسلّـك مـع الأسـلاك
لين أبتـدا طيفـك يلوحـي

هاذي من البارحـه ذكـراك
تجي على البـال وتروحـي

طلّّت عليّـه مـن الشبّـاك
وخلّت لي البـاب مفتوحـي

أشتقت لـك والغـرام فـداك
والشوق مخطي ومسموحي !

والوف قلبي علـى لامـاك
يطبخ من الهجـر ويفوحـي

و يا حسبي الله على فرقـاك
يوم أردت الحـبّ مذبوحـي

__________________

منتديات قبيلة الغنانيم

12-07-2011, 09:53 PM

#30

سعود بن منيف بن نافه

كاتب ذهبي

تاريخ التسجيل: Jun 2011

المشاركات: 2,021

معدل تقييم المستوى: 16

يتـــــبع

كل مـا غنيّـت قـاف ٍ يطـرب اللّعابـه

أعترض لي من يقول .. أنته وراك تغنيّ ؟

قلت قصّـاد وعلـى قـدّه يقيـس ثيابـه

قال أردّ العلم عنك .. وقلـت ردّه عنّـي

أثر حتى في الهوايـة مشكلـه وطلابـه

أتركوني ما أحترفت ولا أشتهـرت بفنّـي

والله أنّي مـا دخلـت الساحـة الكذابـه

ولا نزلت بسوق يعننّـي ويـا ذاكنّـي !!

أي وربي ما مسحـت الجوخـه الجذابـه

ولا ترجيّت المشالح بيـن هـنّ وهنّـي

لي سموّي لو سموّ الشيخ ما يرضا بـه

المـدوح الزايفـه لا ينتظـرهـا مـنّـي

أن مدحنا ما مدحنا غيـر أسـود الغابـه

لو عيال الذيب ترقص مع عيال الجنّـي !

عشت يا راسي بخير ولا عليـك رقابـه

يا عسى تفداك روس ٍ خاب فيهـا ظنّـي

""""""""""""""""""""""""""""""""""""""""""

ما عاد عندي غـزل يـا سيـد خلاّنـي
لكـنّ هـات المـقـوّل ونتغـنّـا بــه

اللي بقى شطـر بيـت وعاقـد لسانـي
الحـبّ بالشمـع الأحمـر قفّـل أبوابـه

أخـذه علشـانـك .. و ودّه علشـانـي
وإليا حفظت الغـلا .. لا تبحـث أسبابـه

مشغول يا صاحبـي فـي واحـد ٍ ثانـي
والله لا يشغلـك غيـر بطاعـة كتـابـه

راح الـزمـان يتشقـلـب ويتحـدانـي
والوقت ضيّع هقـاوي مـن تهقـوا بـه

آخر زمـن عقـب مـا دارنّ الأزمانـي
قـام الجويهـل علينـا يفتـل أشنـابـه

يومي براسه مـا بيـن فـلان وفلانـي
ينفـخ علـى مشتهـاه ويشعـب ركابـه

لـه قصـة ٍ ثابتـه بأحـداث خيطـانـي
قامـوا عليـه الرجـال وهـجّ بثيـابـه

من أنت يا اللي تسـبّ أطـوال الأيمانـي
زلابـة ٍ ظاهـره مـن منقـع زلابــه

لا ساس معروف .. لا عزوه .. لا عرباني
لا فعل مشهود .. لا ميراث .. لا لابـه !

أمـه عراقيّـه وجـدّ أمــه إيـرانـي
خليـط يـوم السلالـه جلـب جـلاّبـه

مقطّـع أربـع ومنـه أشكـال وألوانـي
ماهو لحالـه يـا كثـر اللـي تقـدّا بـه

يزمـر علينـا الزبـيـري والزبيـرانـي
واللاش عـوّد يشيـل السيـف بنصابـه

عـن إزدواجيـة التجنـيـس بالعـانـي
زاد الفتن بالفتن مـن حـرّ مـا صابـه

عز الله أنـه فـي شـقّ الصـفّ فنّانـي
وأنّه على إسمه ومن ودّاه .. مـا جابـه

الله يصـون البلـد مـن كـلّ شيطانـي
ليت الجويهـل يمـوت وقبـره أولابـه !

"""""""""""""""""""""""""""""""""""""""""""

يا أم رقيبه .. وأم عيـون
يـا ناقتـنـا المزيـونـه
مالك شكل .. ولا لك لون
توصيفـك نقصـر دونـه
أبـوك بعيـر ٍ مجـنـون
وأمّـك مثلـه مجنـونـه
راسك درمـوح ومدهـون
بأذانـيـه المـقـرونـه
وجنوبـك شعلـة زينـون
مغسـولـه بالصابـونـه
تلمـع وإبليـس الملعـون
من يآمـن شـرّ عيونـه
شرابـك زيـت الزيتـون
وأكلـك صمـون وتونـه
جبتـي وانيـت وصالـون
والجـايـزه مـرهـونـه
وغنّوا لك شعّـار الكـون
وكـل ٍ يبـدع بلحـونـه
و ساموك بعشره مليـون
معـك العالـم مفتـونـه
وشـراك القـرم الدنـدون
وأشتالـك فـوق متونـه
ومن دون أصبحتي في دون
وأخلـف عليـك ظنونـه
بالمشعـاب وبالحـاجـون
ذقتـي منـه المهـونـه
عيشي في شبك ٍ مدفـون
وإلاّ موتي .. مسجونـه

"""""""""""""""""""""""""""""""""""""""""""""""""" """"""

لا والله إلاّ ذبحـك البـرد
يا قلبي وقمـت تنفضنـي
ممحل وفيك الطواري شرد
وعلى الهبايب تعرّضنـي
وأنا نحيل وضلوعي جـرد
وإليا تعافيـت تمرضنـي
طبعي من الله صلف وعرد
ميـر المحبّـه تروّضنـي
على الخلايق نثرت الورد
لو اكثر النـاس تبغضنـي
ولا ودّي أكحل عيون القرد
إلاّ ليـا قـام يلحظنـي !

"""""""""""""""""""""""""""""""""""""""""""""""""" """""""""

__________________

منتديات قبيلة الغنانيم

التعديل الأخير تم بواسطة : سعود بن منيف بن نافه بتاريخ 12-07-2011 الساعة 11:11 PM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
صقر النصافي	الصريـح	منتدى الشعر والقصص الشعبية	6	02-08-2013 02:08 PM
الشاعر العملاق في سيرة بسيطة في جريدة اليوم	سعود بن منيف بن نافه	منتدى تاريخ وديار قبيلة الغنانيم.	10	02-14-2012 12:16 AM
الشاعر ملفي المورقي للعبيكان: الدين ما فيه الحياء والمجامل	الصاعق	منتدى الشعر والقصص الشعبية	3	09-18-2011 04:38 PM

		منتديات شبكة قبيلة الغنانيم الرسمية > القسم الخاص بالقبيلة > ديوانية شعراء الغنانيم > دواوين شعراء الغنانيم
ديــــوان الشاعر /ســـداح الغــنـــامي العــــتيـــبي

اسم العضو		حفظ البيانات؟
كلمة المرور

تعليمات المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code is متاحة الابتسامات متاحة كود [IMG] متاحة كود HTML معطلة Forum Rules