المشاركة الأصلية كتبت بواسطة الفدرالي



ابو رامي مساء الخير والله يعطيك العافيه

اولاً : اشكرك على صبرك .

ثانياً : اشكرك على حسن تعاملك .

ثالثاً : اشكرك على ماتتحفنا به بغض النظر عن معتقدات صاحبه لأن مثله كمثل العلماء اللي في عصرنا .

رابعاً : اشكرك لاجابتك على الاسئله فلا تعتقد ان مادار بالامس تنقيص من مواضيعك وإنما محاولة لفهم مايدور حولنا وأغلب تركيزي دائماً لشخص مثلك لكي نستفيد منه على اقل تقدير ، وبالنسبه لما يكتبه نزار قباني فإني أرآه مثله مثل مانتعلمه كل يوم (( غير العلوم الدينيه بالطبع )) ويكون اكثرها مصادره اهل الشرك فلم يمنعنا ديننا الاسلامي من اخذ المفيد منها والكلام في هذا المجال يطول ولكن يبقى لدي الكثير من الاسئله

سؤال محيرني يابو رامي (( هالجمله اغلب الناس مايحبها مدري ليش بعض منهم يتوقع انه استهزاء والبعض الاخر مدري وش تفكيره )))

قبل سؤالي تدري يابو رامي ان اخوك بدأ يطلع على الشعر العربي بعد ما كان مكروه عنده

والسبب انت ونزار هههه (( افصل هذا السطر عن الجمله التي قبله )) والمقصود سبب بداية اهتمامي في الشعر

ضيعت سؤالي : ايه صح ليش قصايد هزار ماهاب مثل القصايد اللي اشوفها يعني تكون آخر كل بيت حروف مثل بعض ابو رامي الله يعطيك العافيه لاتشك في سؤالي ترا والله اني صادق ترا ما اعرف الا القليل في الشعر وانشد طلال لني مرسله مره سالفه واقول وش رايك في القصيده

ختاماً تقبل مروري وتقديري واحترامي وعتذاري لما بدر مني ان فهم على غير مقصوده

ملاحظة لاخوي سلطان القصيده اللي جبتها يقولون المطاوعه انها لشاعر سعودي والله اعلم






الفدرالي يا مرحبا تراحيب المطر ( مطر الربيع والصيف والخريف)
اعتذارك على عيني وراسي مع انك ما سويت شي يوجبه ولاكنه من طيب اصلك ورقيك
انت تدري متى ازعل اذا شفت الأدب العربي مهمل وشقتك انت بالذات ما تهتم فيه
تقول فيه سؤال محيرك ( ليش قصايد نزار ماهي مثل القصايد الثانيه )
واجابة سؤالك هذا عند سلطان مطلق والاساتذه الأخرين الموجودين معنا في المنتدى لآنني كما تعرف دراستي كلها في الادب الهندي هههههههههه
المهم الشعر يالفدرالي الله يسلمك بحور كثيره العربي الفصيح له عدة بحور والشعر العامي ايضآ له عدة بحور وشعر نزار قباني يدخل في الشعر الفصيح له قصائد موزونه وله قصائد تفعيله وله في الشعر الحر واغلب قصائده في التفعيله والحر
المهم خلك من بحر قصائده واستمتع بابداعاته واخراجه للغه العربيه من دائره النحو والصرف والاعراب والكبت الذي اصابها
عمومآ الله يحييك وزارتنا البركه والمحل محلك وحنا ربعك واهلك وجماعتك وسيارتك حطها تحت الشره الدوفاء اللي قدام البيوت عن الشمس واخذ راحتك بس انتبه للورعان لا يكسرون قزازها وينسمون كفرها والا يشخطون بديها بالمسامير
الفدرالي اسعدني تواجدك الله يعطيك العافيه