أن زان لك وقتك تخير بالأصحـاب=وان شـان وقتـك كلهـم مايبونـك
وأن جيتهم قامـو يحـدّون الأنيـاب=وان رحت عنهم بالقفـا يشذبونـك
لا..دبّرت دنيـاك والحـظّ ماطـاب=الناس لا..من طحـت مايرحمونـك
أهل السيوف اللي يقصّون الأرقـاب=أمّـا كفاهـم واقعـك يظلمـونـك
لا..تامن العقرب ولاتامـن الـداب=السمّ واحـد لا..رقـا فـي متونـك
ياجاهـل الدنيـا ودورات الأسبـاب=أعرف ترى من خان غيرك يخونـك
لو كان لك ربع(ن) موالين واحباب=لابدّهـم عقـب الغـلا ينكـرونـك
وقت(ن) يشيّب بالمخاليق ماشـاب=اسأل رجـال(ن) جرّبـو يخبرونـك
واحذر تخاوي كـل هافـي وكـذّاب=أهل الـردى بطبوعهـم يطبعونـك
أرفع مقامك عن رديين الأ نسـاب=وان شفتهم في حضرتـك يمدحونـك
فارق ثراهم وارق في راس مرقاب=دعن اللـي لونهـم غيـر لونـك
خلاّن مال ومالهـم ربـع واقـراب=لاقـلّ مالـك عدّهـم يكرهـونـك
أعتاض فيهم من طويلين الأشنـاب=اللي الـى مـال الدهـر ينفعونـك
لاصكتـك دنيـاك وافـتـرّ دولاب=بانـت مواقفهـم ولا يرخصـونـك
هذا رفيقك مـن قريبيـن واجنـاب=ذخرك وهم في واجبـك يذخرونـك
عندك قريبين (ن) ولو قلت غيّـاب=على صدى صوت الندى ياصلونـك
ياللي سمعت العلم لاتفتـح البـاب=لاتنحشر في شي ماهـوب شونـك
ربعك ألى من شفتهم صارو احزاب=وتشاورو بالـراي والعلـم دونـك
لاتبدي برايك عليهـم ولـو صـاب=لو صحت باعلى الصوت مايسمعونك
ومن لاحسبّلك لاتسوي له حسـاب=لو كان يسوى وحدة(ن) من عيونك