هيا الغبيوي العتيبي الملقبة بفتاة الوشم*شاعره معروفه من زمن طويل في مجال الشعر*ومن أشهر شاعرات الجزيرة العربية
إليكم هذه الردية الجميلة والجزلة بين الشاعرة فتاة الوشم والشاعر محمد بن سبيل تقول الشاعرة فتاة الوشم عن الزمن الذي تغير
*تـل قلـبـي تــل ركــب المهمهـيـه
يوم خف الشيل وشنونه طووها
في لهيب القيظ صبحه مع عشيه
بالمطـارق والعراقـيـب الهـدوهـا
والمـوارد خـوف والـدار اجنبـيـه
والدروب العوج معهـا سخروهـا
ما طرقهن فـي قديـم الوقـت فيـه
بالمغـازي والمناكـيـف اتعبـوهـا
منوتي ريحـة هـوى نجـد النقيـه
فـي خـلاًًََ منـه الجـوازي جفلوهـا
ما حلا مـن عقـب مزنـه عقربيـه
جـرة العسـاس فيهـا مــا لقـوهـا
شيدو بيت الشعـر بـأرضً عذيـه
شـف بالـي ربعتـه يـوم ارفعوهـا
طوقـه نـبـت الخـزامـا والنصـيـه
في رياض بالجوايـل مـا رعوهـا
وانزلـوه الـلـي يمانيـهـم سخـيـه
وعلقوا ضـو المنـاره واشعلوهـا
واحتمـا محماسهـم بأغـلا شريـه
والدلال الصفر بالصالي شووهـا
وقـدمـو فنجالـهـا مـثـل الـهـديـه
بعد ما بالهيـل الاخضـر بهروهـا
دق نجـرً يجـذب السـاري عـويـه
مـا تـوزو بالمطـابـخ وطحنـوهـا
يوم جيبت مثـل مجهـول الهويـه
مـا تسـر ونارهـا مــا شاهـدوهـا
دلـــة لـــو قـلـطـت بالـطـوفـريـه
ماتساوي اللي على الملـه جذوهـا
تجمـع الظفـران ورجـال الحميـه
والسوالـيـف القديـمـه حـدثـوهـا
في البطوله والخـوي ويـا خويـه
مـن عهـود جدودهـم مـا زيفوهـا
يـامـحـمـد يــازبــون الـدوبـلـيــه
عيني اللـي لمـة البـدو احرقوهـا
مشغليـن البـال والعيـن الشقـيـه
ليت نفسـي بالوعـر مـا علقوهـا
للبيـوت السمـر عـنـدي جاذبـيـه
ليتني سجيـت مـع نـاس نسوهـا
اه وعــــزاه دام الــــروح حــيــه
مــن طـبـوعً للقـبـايـل سيـبـوهـا
بدلـوهـا بطـبـع مــا لــه قابـلـيـه
واستـعـار ولهـجـة مــا علمـوهـا
راحت الشيمات يا محمد ضحيـه
والتقالـيـد العريـقـه مــا بـغـوهـا
فرد الشاعر محمد بن سبيل
*فـز قلبـي مـن وصـول الخـط لـيـه
فـــزت امً فـــي ولـدهــا بـشـروهـا
غـايـب عـنـهـا ولا لـــه مـقـدريـه
منشغـل منـه المعازيـب احرمـوهـا
مرحبـا ترحيبـة النـفـس الرضـيـه
بالرساله واهلها ومـن احضروهـا
يـا فتـاة الـوشـم لــك مـنـي تحـيـه
شاعـرة نجـد العـوارف رشحـوهـا
تشتكيـن الشـوق للماضـي علـيـه
منـوتـك شـوفـة بـيـوت شـيـدوهـا
شـوفــت الـحــوال بـديــار خـلـيـه
خلفـهـم بـاقـي دبشـهـم عقـبـوهـا
بيـتـهـم بالـقـيـظ تـســداه بـدويــه
وانهتـه قبـل المخايـل وشكـروهـا
والحنـيـن لـذيــك الايـــام الهـنـيـه
يـوم اهـل نجـد العمايـر مـا بنوهـا
لا يزيـد الـشـوق وتـزيـد الشكـيـه
البـيـوت السـمـر اهلـهـا بيـعـوهـا
العراوي صـار مـن عقـب المطيـه
مركب البـدوان وجمـوس شروهـا
وبعـد مــا كـانـو يـربـون الرعـيـه
الـذبـيـحـه لا بـغـوهــا دوروهـــــا
ما جعل روحي على حوض المنيه
غـيـر تـذكــاري طـبــوعً بـدلـوهـا
لا طرت لـي عيشـة البـدو الحليـه
والحيـاة اللـي بعضهـم سمجـوهـا
جـظ قلـبـي جـظـة مضـيـع خـويـه
فــي ديــار مقـفـره مــا سنـعـوهـا
وزادت اشواقـي وحسراتـي خفيـه
للسنيـن اللـي جـدودي عاصروهـا
مـا حــلا صـيـد الضـبـا بالبندقـيـه
لين حدوها علـى الخيـل و رموهـا
وما حـلا بالبـر عـزف السمسميـه
والربابه في يدين اللـي اعشقوهـا
مـا تقهـوو مـن قـهـوة الزمزمـيـه
دلــة الـرسـلان سـاعــة بـهـروهـا
واختـلاف الـوقـت نعتـبـره زريــه
عيشة الماضي بكوا مـن جربوهـا
هــذه الدنـيـا عـلـى العـالـم جـريـه
هـي تجاهدهـم واهلـهـا جاهـدوهـا
واسلمـي يـا بنـت حاميـن الونـيـه
ما بدت شمس النهـار و طالعوهـا
jg rgfd v;f hglilidi
10-28-2012, 08:38 PM
تل قلبي تل ركب المهمهيه
تعليمات المشاركة
المواضيع المتشابهه
