إي والله أهوجـس ولاني بمرتـاح = والحزن فى حوش الحنايـا بفـاروع
أمسيت من وصل المواليـف مـزاح = وأصبحت من فرقى المواليف مفجوع
البارحه .. في غبـة الوصـل سبـاح = واليوم من عرش المواصيل مخلـوع
ياصاحبي .. صرح الهوى والوفا طاح = والقلب كنه مـن عراويـه مقشـوع
كنت أحسب إن لحبنا عشـرة أرواح = إلين شفت الحبـل بيديـه مقطـوع
يوم العهد به حده إسبـوع لا راح = إسبوع .. ويعوّد علي شـوق ودمـوع
واليوم خمس سنين والهـم .. مـازاح = هم الفراق اللي بلا عـذر مشـروع
أستغفر الله تسعـة شهـور ياصـاح = في غيبته قمت أحسب اليوم بإسبوع
العام .. خلي يسمـع القلـب لا صـاح = واليوم .. مهما صاح ماهـو بمسمـوع
ضاع الحساب وشفت برق الجفا لاح = وأيست لولا إن الرجا فـي مـزروع
وحالي نحل والحال مهوب منسـاح = من كثر ما أظمى للمواصيـل وأجـوع
بليت في من دونه سيـوف ورمـاح = وغدا علي وصله مثل حبـة الكـوع
له مني إن سره على الناس مابـاح = ولي منه إن الصد غصب ٍ بلا طـوع