هيّض علي اللي يجرّ الغَنَاني = في راس مرقاب ٍ مويق ٍ لحاله
في راس مرقاب ٍ شمال المحاني = يجرّ صوته لين لجّت حِياله
دارك عليّه يالمغنّي تراني = صبري قليل وخاطري به زَعاله
هيّضتني واخلفتني من مكاني = واخلفت قلبي لين لجلج محاله
يابن حمد خلك صبور ٍ امساني = وماراح من شي ٍ على الله بداله
منوّل تسوق مشرهفات الاذاني = شول ٍ يقهّر له خلافه عياله
تسوقهن مع البِرَق والطماني = وواد الجرير اليا اعتقب نبت جاله
مع الاد روق مشيّدين المباني = يرعون نبته مع جراير خياله
يرعون نبته بالجنوب المتاني = فالوقت الاول يوم لحقه مجاله
سلفان عوج ٍ ماتشيل العواني = تخضّ نجد اليا تطارد ارهاله
وان جاهم العسّاس والنبت حاني = ذكرلهم نبت ٍ جديد ٍ خياله
شدوا طلوع الشمس من كل شاني = ووقت العشي كل ٍ موطّن رحاله
وان وايق الصايح براس البياني = وقال افزعو ذودي غدوبه رجاله
عنّو من العذره بنات الحصاني = وكل ٍ فصخ عن مِرشحتها جِلاله
وركبوا علاهنه وركبنهن جناني = قامت تصاهل ماتردّه حباله
ولحقوا على خمس وثلاث وثماني = وكل ٍ نهضها فازع ٍ من قِباله
هذاه معه مصقّل ٍ هندواني = وهذا معه شلفا تحزّم بشاله
تطلّقوا مثل القطا السرّحاني = وغطّا نفلها نايف ٍ من جباله
لحقوا قطيع ٍ غادي ٍ به فلاني = وحاسوه في حزم ٍ تطارد سهاله
وردّوه كيد ٍ غصب ماش ارضياني = بشلف ٍ تبارق في يداهم سِلاله
........................... = ............................
وبرقا على ايمنهم تضد اقحطاني = وتردهم يمّ اليمن عن شماله
اسفل منازلهم طويق اليماني = يكفّ منزلهم شناخيب جاله
في راي من يروي رهيف السناني = خيّال زيزوم الرمك في اقتاله
وخيّال عفراً ربّعت فالمثاني = حامٍ الها واد الرشا من عَيَاله