صلح لي الطبخه تراى الراس منداش=بعدن عن اللجات فلة حجاجي
ثم قرب اللي فزته سبق الارماش=جاء فالبواخر قاطعات الهماجي
متخيره من شركته والثمن كاش=وافق مزاج امصممه مع مزاجي
يفز مثل الطير يوم القدم ناش= بنزيمه اللي يوصله للبواجي
صافي وجاين له مع الحزم نشناش=نشناش ندرن عقبه السيل راجي
عليه صندوق المعاميل وفراش=واخلاص من عند الحمد والعواجي
ابا اخذ اغراضي وابا روح طراش=متذكرن بيت الشعر والسراجي
ابغى ديارن حبها ابلشني ابلاش=ريحت هواها لضماير علاجي
لوكان شوف البر مايبرد الجاش=يكسر صميم القلب كسر الزجاجي
راحت صحاري نجد صاجن ومنقاش=وش ياخذ المنقاش من بطن صاجي
والبر باقن به بطانيج واخياش=واكوام رملن مع دروب العجاجي
واهل الدبش خلوه والعامل انحاش=وانته ليابرقت مامن خراجي
ياعاشقن بيض الصحاري والادباش=رد الشبوك ودها للحراجي
واجلس على التلفاز واسمر على طاش=واصبر على ريح السمك والدجاجي
عش بين حمران الجلامد والاحباش=عيشت غريبن عن مرابيه لاجي