جاني وانا في وسط ربعي وناسـي=جاني نشلني مثل ما ينشـل النـاس
منـي نشـل روح تشيـل المآسـي=تشكي من ايام الشقى تشكي اليـاس
اثر الالم في سكرة المـوت قاسـي=ماهالني مثله وانا انسـان حسـاس
جابوا كفن ابيض مقاسـه مقاسـي=ولفوا به الجسم المحنط مع الـراس
وشالوني اربع بالنعـش ومتواسـي=عليه ومغطى على جسمـي البـاس
وصلوا علي وكلهـم فـي مآسـي=ربعي ومعهم ناس من كل الاجناس
ياكيف سـوا عقبنـا تـاج راسـي=وامي الحبيبه وش سوى بها اليـاس
اسمع صدى صوت يهز الرواسـي=قولولهـا لاتلطـم الخـد يـانـاس
قولولهـا حـق وتجرعـت كاسـي=لاتحترق كل يبـي يجـرع الكـاس
اصبحت في قبري ولابـه مواسـي=واسمع قريع نعولهـم يـوم تنـداس
من يوم قفوا حـل موثـق لباسـي=وعلى رد الروح صوت بالاجراس
هيكل غريب وقـال ليـه التناسـي=صوته رهيب مرعبن ماله أجنـاس
واقف يقول إن كنت يانمـر ناسـي=هاذي هي اعمالـك تقـدم بكـراس
ومن هول ماشفته وقف شعر راسي=وانهارت اعصابي ولاارد الانفـاس
ياليتنـي فكـرت قبـل انغمـاسـي=بالغفلـه اللـي منتهاهـا للافـلاس
وفزيت من نومي على صوت ناسي=واصرخ واقول الموت وأحذر الناس