لولا المعزه ماكتبنا بالأقلام=لربعٍ لهم بالقلب قدر وحشيمه
روس الرجال مزبنة كل منضام=نطاحة الكايد بحزم وعزيمه
اهل الفخر والطيب عامٍ بثر عام=أهل النقا وأهل القلوب السليمه
مني لهم ماطار طيرٍ وماحام=وماهبت رياح الشمال ونسيمه
تحيةٍ تبقى على طول الايام=معها المعزه فالحنايا مقيمه
قلته وانا الروقي ومن روس غنام=قومٍ تموت ولاتعرف الهزيمه
فينا الوفاء مزروع والدرب قدام=نافي ونوفي مانحب الظليمه

يامرحبا وأهلين يافدح الأقرام=إعداد ماهلت من الغيم ديمه
ياللي نعده فالقسا درع وحزام=نسل الرجال اهل الفعول العظيمه
في وقتنا الحاضر وفي ماض الاعوام=طيب الفعول إلهم عليها وسيمه
وأنته كريم وربعك كرام وحشام=وأنته ولد شيخ الرجال الحشيمه
مقام عز ووقفته عز لاقام=وقفة بطل مافيه منهو يضيمه
شيخٍ ليا منه تلاقا بالاخصام=من سطوته تلقا الغبون بخصيمه
يرخي عليهم مايداري وجزام=كبود العداء من فعل كفه سقيمه
جعله بجنة خلد ينعم بالانعام=يالله يامحيي العظام الرميمه