يقول ابو خالد بقافٍ تغنى به=في ليلة نارها تصبح وهي حيه
يسمر على القاف لين ينوّخ ركابه=من هاجسٍ ما مشى درب الهواويه
أحرص على الزين قبل الشين تشقى به=وان طاوعك طاوعه واخلص له النيه
قبل ان وقتك عليك يكشر انيابه=ويقفي بك العمر في روحه بلا جيه
والوقت لو هو ضحك لا تامن عقابه=لا اعطاك حسنه بعدها يعطي السيه
وأعمل على الطيب كله وابذل اسبابه=الطيب ظلٍ ظليل وتحته الفيه
واجهر بصوتك ثم اعط الحق طلابه=ما ينكر الحق غير الجاهل العيه
والشين راعيه لا منه فتح بابه=ماشاف عينٍ بها رحمه وماويه
ينبذ من اهله قبل ينبذ من اقرابه=ولا يقبله غير غيٍ معجبه غيه