.
.
من دون ان يشعر أحدهم يتكتل ،، ينسج من واقعه حكايا ،،

يرسم تفاصيلها في الملف الشخصي ! وينقلها هنا من باب المشاركة :

.
.

1/

ديما تراودها الظنون انّي بصير اغنى رجل
ــــــــ وابني لها بكرة قصر حوله نوافير وزهور

وانا اضرب القيعان وارمي بالحجر طير الحجل
ــــــــ اهرب من الواقع وامدّ لبهجة ايامي جسور

خيال ديما يكبر وتسأل واجاوب في خجل
ــــــــ بعدين يابابه واحسّ انّي كذبت بلا شعور

لان الظروف اكبر من ابعاد الكلام المرتجل
ــــــــ واقسى من الضيقات لاقامت تداحم في الصدور

..

.
.

2/

يلمزني الجاهل عديم المرجلة بــ ( ابو البنات)
ـــــــــ مايدري ان البنت نعمة تعني الشي الكثير

طعم الحياة انثى وانا بناتي اغلى الكائنات
ـــــــــ شوفة حداهن لاتعبت تبدد الهم الكبير

تزهر على شفاهي ليا غنّيت فيهن سوسنات
ـــــــــ اضحك وينبت لي جناح وتنتعش روحي واطير

فيهن حديث المصطفى راوينه الناس الثقات
ـــــــــ من يكفل الثنتين مع جملة هل الجنة يصير

ــ
.
.
.

3/

ياترى كم باب موصد خلفه بنيّة رقيقه
ـــــــــ تذرف الدمعة بغرفتها وتجرحها الثواني

بين تصديق الخيال وبين تكذيب الحقيقه
ـــــــــ تنتظر فرحة لياليها وتحقيق الأماني

يحتويها الشوق وترفرف عصافير الحديقه
ـــــــــ في زوايا روحها وتبدّد الحزن الأناني

من مشاعرها العميقة للدباديب الأنيقه
ـــــــــ ترسل انواع الزهور وتهدي اشعار وأغاني

كلّ مامرّ الصباح بنافذتها بلّ ريقه
ـــــــــ من بهاها واستفزّ احساسها باحساس ثاني
،،
.
.

..

4/

يارب سترك ولطفك يا ارحم الراحمين
ـــــــــ من هالشعر والشعور اللي تراكم علي

اسرفت اعدّ المواجع واشتم الغافلين
ـــــــــ واستذنب بواحدٍ داله وقلبه خلي

غروٍ نعس في خيالي مادرى بالسنين
ـــــــــ حضن بهاه وتوسّد حلمه المخملي

حرّك شفاهه وفاحت ريحة الياسمين
ـــــــــ واحمرّ خدّه وكذبت بوصايا هلي

مايدري انّي عشانه والبدو راحلين
ـــــــــ عشيت ذيب الخلا كبدي وكبد جملي
..

.
.
.


5/

على ويش ياربكة هدويّ وياضوضاي
ــــــــــــ فقدت الشعور وفاقد الشي مايعطيه

كفى تعذلين الشاعر الموجع النسّاي
ــــــــــــ يبي يفتكر حب الوطن بس مايمديه

عشانه قفز فوق الخيال وتحوّل ناي
ــــــــــــ بغوا يحرقون لسانه ويقطعون يديه

لبس درع جنبه واحتزم للزمان الجاي
ــــــــــــ ودربٍ مشى به صعب لابد ماينهيه !
..
.
.


6/

حذفتك البارح من اللّستة ليا الأمر الأخير
ــــــــــــــــــــــ ماهوب كرهٍ لك ولكن ماتعوّدت الخضوع

كبير جيتك يا اللعوب الفاتنة وارجع كبير
ــــــــــــــــــــــ ربّاني الوقت وعرفت القسوة وحبس الدموع

ماني بمكسور الجناح ليا بغيت اطير اطير
ــــــــــــــــــــــ ارحل مثل ماترحل ايام الحياة بلا رجوع !

..


تحايا عطرة ،،

اخوكم : سلطان

..

---

lk hglgt hgaJJJ owd !