البارحـــه يـــوم الخلايق نيــامــا = بيحت من كثر البكا كل مكنون
قمت اتوجد وانثر الماء على ما = من موق عين دمعها كان مخزون
ولى ونة من سمعها مايناما = كني صويب بين الاضلاع مطعون
وإلا كما ونت كسير السلاما = خلوه ربعه للمعادين مديــــــــون
في ساعة قل الرجا والمحاما = في ما يطلع يومهم عنه يقفــــون
وإلا كما ونت راعبية حماما = غاد ذكرها والقوانيص يرمـــون
تسمع لها بين الجرايد حطاما = من نوحها تدعي المواليف يبكون
وإلا خلوج سابية للهياما = على حوار ضايع في ضحى الكون
وإلا حوار نشقوله شماما = وهي تطالع يوم جروه بعيـــــــون
يردون مثله والظوامي سياما = ترزموا معها وقامو يحنــــــــــون
وإلا رضيع جرعوه الفطاما = توفت امه قبل اربعينه يتمـــــــــون
عليك ياشارب لكاس الحماما = صرف بتقدير من الله مــــــــــأذون
جاه القضاء من بعد شهر الصياما = صافي الجبين بثاني العيد مدفون
كسوه من بيض الخرق ثوب خاما = وقاموا عليه من الترايب يهلــــون
راحوا بها حروة صلاة الاماما = عند الدفن قاموا لها الله يدعـــــــون
برضاه والجنة وحسن الختام = ودموع عيني فوق خدي يهلــــــون
حطوه في قبر غطاه الهداما = في مهمة من عرب الامات مسكون
ياحفرة يسقي ثراك الغماما = مزن من الرحمة عليها يصبون
جعل البخري والنقل والخزاما = ينبت على قبر به العذب مدفون
مرحوم ياللي ما مشى بالملاما = جيران بيته راح ما منه يشكون
ياوسع عذري وان هجرت المناما = ورافقت من عقب العقل كل مجنون
اخذت انا وياه سبعة اعواما = مع مثلهن في كيف مالها لون
والله كنه يا عرب صرف عاما = ياعونة الله صرف الايام وشلون
واكبر همومي من بزور يتاما = وان شفتهم قدام وجهي يصيحون
وان قلت لا تبكون قالوا علاما = نبكي ويبكي مثلنا كل محزون
لا قلت وش تبكون؟ قالوا يتاما = قلت اليتيم اياي وانتم تسجون
قمت اتشكا عند ربع اعداماما = وجوني على فرقا خليلي يعزون
قالوا تجوز وانس لامه بلاما = ترى العذارى عن بعضهم يسلون
قلت انها لي وفت بالولاما = ولو جمعتم نصفهن ما يسدون
ما ظنتي تلقون مثله حراما = ايضا ولا فيهن على السر مامون
واخاف انا من عاديات الذماما = اللي على ضيم الدهر ما يتاقون
أو خبلة ما عقلها بالتماما = تضحك وهي تلدغ على الكبد بالهون
توذي عيالي بالنهر والكلاما = وانا تجرعني المر بصحون
والله لولا هالصغار اليتاما = وخايف عليهم من الدجه يضيعون
لقول كل البيض عقبه حراما = واصبر كما يصبر على الحبس مسجون
عليه مني كل يوم سلامـــــــــا = عدة حجيج البيت واللي يطوفون
وصلوا على سيد جميع الاناما = على النبي يللي حضرتوا تصلون