أمانة يا بلدية عفيف تريّحون البال =نبا الخط الشمالي من عفيف يصير ردمية
طلع دوارنا الشرقي بعد ما شلتم التمثال =طلع ضيّق مساره مثل دوار البجادية
تعودنا على ضرب الكفر وسط الحفر موال =ركب ومساعدات وكل يومٍ فالصناعية
ليامن المطر جا والشوارع تصطفق للجال =ترى طيحتك فأدنى حفرةٍ فيها طبيعية
يا زين المدخل الشرقي ليا مريت به تهتال =رصيف مسطحاتٍ خضر وأنواراً خيالية
ليا جيت الإشارة ديور ادخل شارع العمّال =على هونك لا تسرع وامش شوية شوية
تا تلقى شارعٍ ميّت تقول مدمره زلزال =تقول مدمره زلزال وألغامٍ نووية
تروح يمين وإلا شرق وإلا غرب وإلا شْمال =تشوف الوضع نفس الوضع ما غيّر ولا شية
ورح للمدخل الغربي وشوف الحال يرثى الحال =حفر، صبات، تحويلة بدون أنوار ضوئية
طلع ما هوب قار اللي تصبونه طلع صلصال =ما هو معقول كل شوي يطلع فيه حفرية
أنا بسأل سؤال ومن يجاوبني على السؤال =بلدية عفيف اللي على الشارع حقيقية
رسالة عن طريق المنتدى وإلا على الجوّال =ويقراها المواطن والمواطن له أحقية
أبرسلها على المسئول تبقى جاري الإرسال =تعلّق قيد للتسليم والعلّات مخفية