السلام علاكم وشلونكم طول السنين الي راحت هاذي عساكم طيبين
طيب فاصل ونواصل و تشكراتي .

ذاك اليوم وانا مسنتر في الإستراحه
جالس العب بلوت دق جوالي وكان اخوي
العود ( الكبير )

طلب مني ان اخذ حرمته
من بيتنا واوديها لبيته لأنه يبا يتأخر
>>>> مشكله يوم تكون فيه اخوان اكبرمنك
ولاعندكم سواق


بعد ماركبت معي حرمة اخوي
وبعد مادخلت احد شوارع السلي العامه

إلا ذيك الدوريه اللي تقول : ياراعي الهونداي
أصفط على جنب
>>> يعني لازم تعلمهم إن معاك سوناتا 2010
نزلت ودار بيننا نقاش حامي

العسكري يقول انه مشتبه فيني
ومن حقه يفتش السياره

وانا معارض انه يفتش السياره
وكيف يوقفني اصلاً وانا معي حرمه
داخل السياره

فتح العسكري باب السياره
اللي جنب السواق ( بالعربي باب المعاون )
وركب السياره يفتش

لاشعورياً ركبت مع باب السواق
واخذت قزازة العطر
>>>> لازم تقول انه معاك عطر بالسياره

وضربته على راسه
وبدا الضرب والتكفيخ داخل السياره
انا بالقاروره في راسه ووجهه
ماحسيت إلا بالدوريه تصدم سيارتي من ورى

طبعاً العسكري الثاني

عشقت قير السياره بنمرة دي
ومشيت والعسكري كان معي بالسياره
جلست اضرب فيه حتى نقز من السياره

بعد مطاردة قصيره في شوارع السلي
قدرت اضيع الدوريه
>>>>>>>> ارحمني يامسحبل عشق

نزلت حرمة اخوي في بيتها
وتوجهت للبيت وعلى طول نمت

في صباح اليوم التالي
شغلت السياره ابي اتوجه لجامعتي الحبيبه

ونزلت من السياره اطالع في الصدام الخلفي
وخابرن فيه ضربتن بسيطه

واتفاجا بسياره تصفط جنبي
وينزل منها 4 اشخاص
وهم يسحبوني مع رقبتي
ويحذفوني في شنطة السياره ويقفلون علي

بعد نص ساعه
حصلت نفسي داخل السجن
والعسكر يسحبون فيني وسط السجن
لاان وصلت لظابط المسعول .

جلس الظابط يحقق معي

الظابط: اسمك وكنيتك

قلت: اسمي باليل الداج وفالصبح
يهزني الشوق ويصير اسمي هواوي

وكنيتي على قولة كوين مدري . يمكن الملك السفاح

الظابط: تدري ليش انت هنا

قلت: بصراحه مدري

الظابط: انت مطلوب بعدة قضايا ارهابيه

1ـ حاولت تخطف عسكري

2ـ قاومت العسكري وحاولت قتله>>>> ياويلي ما اقتل خنفوس

وذلك بضربه بمسدس على راسه

3ـ تسترك على إرهابي مطلوب
من قائمة الــ24 وذلك بإخفائه
بزي انثى

قلت: لاخطف ولاهم يحزنون
العسكري هو اللي نقز في السياره
بعدين ضربته بقارورة عطر

ويشهد علي الله اني سارقه من سيارة
ولد عمي . ربي لايعيده يوم سرقته

بعدين يوم مشت السياره نقز منها

والإرهابي اللي تقوله حرمه
وعلى قولتك انثى ماهو إرهابي

الظابط: طيب يالداج
راح نتغاضى عن القضايا كلها
بس بشرط تجيب لنا الإرهابي

قلت: يالليل الليل اقول ثور يقول أحلبه

يابن الحلال اللي معاي حرمه انثى
بنت ويمن كل شي فيه مؤنث من وين تفهم انت

قال: طيب مصدقك
حضرها لنا نأخذه أقوالها

قلت: من وين اجيبها لك
خادمه فلبينيه منحاشه من بيت كفيلها
ونغزني الشيطان وركبتها معي

يوم وقفتني الدوريه خفت تسلموني
للهيئه ضربت العسكري وهجيت
ونزلتها في الشارع ورحت بيتنا

>>>>> ابوك يالتصريف والسياسه

زعل الظابط وخلاني واقف
على رجل وحده مدة 13 ساعه
وكل ماقلت له شي

قال: انا عندي قناعه انك تكذب
وجلس يكرر كلمة قناعه عليه هاذي كثير

بعدها قررت وسميته الظابط قناعه
وحطوني في وسط زنزانه متر في متر متكرفس
وجلست 4 ايام


كل مارحت للظابط قال : عندي قناعه
انك تكذب

جلست في زنزانتي ولاعندي
رفيق سوى دميجتي الفاضيه

ناظرت من تحت الشبك
وشفت رجول عسكري واقف

فجاه ظهر لي شيطان الشعرواستحضر

قلت ..
العسكري حول زنزانتي يسحب كراعه
في اخر الليل وحده تقول مقرود

لي في زنزانتك يالعسكري 70 ساعه
ورجولي يالعسكري مكبله باغلال وقيود

رح ياعسكري لظابطك راعي القناعه
دام حبل الجود بين الاجواد ممدود

قله يطلب وصلك ولايبغى انقطاعه
معترف خالص وش تبي زود

خبره كانه يبيها تحدي وجزاعه
وكان السالفه عنده برق ورعود

قله مايذبح الفتى ياقناعه غير اندفاعه
وكانه مااندفع بيموت بشيخوخته عود

قله ماانحنى راسي وقت الرضاعه
كيف احنيه وزندي كما عشرة زنود

قله ترا سجنتي فخر وشجاعه
واختبار لصبري في ايامي السود

قله الداج دكتوراه وزحف وصياعه
وحياته يالقنوع كلها جالد ومجلود

وقله ببدا معه طريق اللكاعه
بأسلوب أخبث من خبث اليهود

قله بستدلخ عليه بفن وبراعه
وبضحك عليه واقول سهود ومهود

وختامها كوب شاهي وكثر نعناعه
وناد لي الظابط ابولغابيب وزغود

واحذف علي زقاره وهات ولاعه
قبل اكتب على جبهتك مساعد ومسعود

يوم طلع الصباح وهم يطلعوني من
زنزانتي ويدخلوني على الظابط قناعه
الظابط: تبي تعترف وتجيب لنا الأنثى
اللي كانت معاك.

قلت: تبي الصراحه اللي معاي
ماهي خادمه فلبينيه

الظابط: من هي اجل

قلت: اللي معاي احتمال تكون صينيه
وإحتمال يابانيه واحتمال كوريه مثلك عارف ياظابط قناعه
كلهم يشبهون بعض
بس الأكيد انها تعرضت لقنبله نوويه ومغيره معالم وجهها

الظابط: تستهبل انت

قلت: لا جالس اقول الغاز

الظابط : الداج تكلم جد

قلت: من الداج ؟
اسمي مساعد ومسعود

واستمرينا على هالوضع اسبوع كامل
من الزنزانه لمكتب الظابط قناعه

اخر شي طلعني من السجن

طلعت من السجن وحصلت اخوي

يقول اخوي: عساك مااعترفت على حرمتي بس

قلت: صاحي انت مابقى إلا هي

قال: اشوى لو إنك اعترفت كان سجنوها

قلت: ليش وهي وش دخلها بالماضوع

قال: يوم قمت تضرب بقارورة العطر
نقزت الحرمه وقالت انا اخت ماجد
وحطت اصابعها في وجههه
وقامت تخربط بوجه الماخوذ باظافرها
وقلبته شكال والوان خخخخخخخخخ..


وبالختام ربي يعز الحكومه والعسكر كلهم
وينصرهم على كل عدوانهم
وخاصه الظابط قناعه والقناعه كنزن لايفنى
ترى كلبوها مزح وخرطي وتسلي واوهام
وتخيلات وهلوسه خخخخخخخ
الداج كان هنيا فمان الله

---

td a,hvu hgsgd