هيضتني قصيدة ابن فطيس الضيقه الكل يعرفها وطلعت مني هالابيات
اتمنى تعجبكم



..
..




الضيقه اللي حضرت تالي عصير
ومنها غدا المري يجـــــر الونيني

هاذي سنه يمي تــــــرد المشاوير
بالذكريات اللي مضـت من سنيني

وطلعت بالمشراف لهــــــا تسير
وذكرني المشراف في نور عيني

غروٍ كلامة مثل در المصاغيـــر
لا اغضى بسودٍ ناعسه يحتويني

يوم البدو شدو يبــــــون المحادير
في راس مشرافي قعد يحترينـــي

وانا على لقياه اســــوق التباشير
لقيا شرف واخلاص ياسامعيني

واليوم من دونه تضيــع المداوير
غـــــدا حبيـــسٍ بين بابٍ وطيني

شابن رسوم الحب واقفن مدابير
وتقطعـــــــن مابين خلـــي وبيني

ونزلت للوادي عسى الضيقه تطير
تعانق حمام الورق لاوحى ونينــي

وذكرني الوادي بــــذودٍ مغاتيــــر
ذكــــرت مرباعه بذيك السنينـــي

من الطرب يقطف بحلو النواويــر
ويطرب حياة اللي قليبه حزينــــي

واليوم من دونه شبـــوك ومواسير
على حياة الشبك واكــــل الطحيني

لاشاف ضوح البرق دمعه شخاتير
ولملاعب البيــــــدا يجر الحنينــــي

ووقفت افكــــــر قلت مالي عن البير
يمكن لشــــوف البئر قلبــــي يليني

ووصلت عند البير جنب النواعيـــر
وقعدت اطالـع من يسـار ويمينـــي

وطـرى علـى قلبـي عيـال مناعيـر
هــاذي منازلهـــم وكانـــو قطينــي

يازين جمعتهــــم وصفـــر مباهير
ومن بينهــــم يدور هرجـــن رزيني

ماعاد فــــوق الارض منهم مداوير
اقفـــــت بهم دنياً رحاهـــــا متيني

دنيـــــــاً تقلــــب مالقينا بها خيـــر
لو ضحكت لك يوم يومــــن تشيني

ومن نزلة الوادي الى الضلع والبير
مماطـــرى للقلــب واشيب عينـــي

لقيت مال الحـــزن حـل وتدابيــــر
الا لــرب الكـــون اوجـــه يدينــي

واطلــب منـه وازيد صوتي بتكبير
واد الفـروض وبعدهـن ركعتينــي

وصلاة ربي عـد وبــل الشخاتيــر
علـى نبـــيٍ سنتــــه تحتــــــويني

المصدر: منتديات شبكة قبيلة الغنانيم الرسمية