اي والله كوني هنا ...
ياحبيبي من ايام الطفوله
...... سعد من باح باسمك واستراح
كل شيٍ على باله يقوله
......لحظة الصدق والشوق المباح
شفني ادركت انا سن الرجوله
..... زهرة العمر راحت في كفاح
اكتم الوجد وارسل لك رسوله
..... انت وين انت ياظبي البراح
وين ضحكتك هاذيك الخجوله
..... ضحكة الغيم لطيور الصباح
ياسحابة فرح مرّت عجوله
..... جت بتمطر وساقتها الرياح
صرت حلمٍ بعيد ازريت اطوله
..... شع في الذاكرة نجمه ولاح
عود موزٍ نما ماني بحوله
..... دم صدري على لاماه فاح
دولة ٍ حكمها في ظل دوله
..... دونها السيف الابرق والرماح
بري حالي من الحب ونحوله
..... مالي الا التنهد والجراح
اسال الحزن والورد وذبوله
..... كيف سدي عقب هالعمر باح
من صغيرٍ لعب دور البطوله
..... في حياتي واخذ قلبي وراح
ماتجي دمعة العين بسهوله
..... لكن الطير سدّل بالجناح
يبو ديما جيت ابا انسخ بيت وكل ما عاينت في اللي
بعده نسخته لين نسختها كلها ...!
ابدااااع منقطع النظير ,
ابيات لا يجيدها الا سلطان القصيد
شهادتي فيك مجروحه يبو ديما
لكن ما اقول غير صح لسانك وقلبك وفكرك
ولا تبطي علينا ...
__________________
{وَمَا قَدَرُوا اللَّهَ حَقَّ قَدْرِهِ وَالْأَرْضُ جَمِيعًا قَبْضَتُهُ يَوْمَ الْقِيَامَةِ
وَالسَّماوَاتُ مَطْوِيَّاتٌ بِيَمِينِهِ سُبْحَانَهُ وَتَعَالَى عَمَّا يُشْرِكُونَ }