سلهمت بالعين وأقفت في دقايق=قمت أخايل زولها قدم البريه
ماتبى لوم المولع والخلايق=ماتخون سلوم أهلها وبدويه
تل قلبي تل والصدر متضايق=من طبايعها وزين الأجوديه
الحلا والزين فالمجمول لايق=والعيون السود مامن مرحميه
والنهد تفاحة(ن) وسط الحدايق=غير هذا مشيها مشي العبيه
يامحمد بعدها ويش الطرايق=كان عندك حل لا تبخل عليه
يازبون الطيب عدتك العوايق=أشهدني عقبها حالي رديه
لغيرها يامحزمي مانيب رايق=وردتني ياولد حوض المنيه !!