يالربع انا سرقت دراهمي
البارح حملت حطبي اللي انا اجمعه ألي شهر في دنه وجلبته للرياض وبعته على هل البسطات اللي في شارع جابر باربعة الاف وخمس ميه وحطيت الخمس في عبي والاربعه طويت علاها رقعه وفوق الرقعه لستك وربطتها بسيم وحطيتها تحت المرتبه وليني عمسان من مناكخ الحطب ورحت لين جيت في طلحات بين سلطانه وصلبوخ وقيلت فيها واخذتلي غطه ويوم قمت وليا السياره معفوله تقول فارسها ذيب وليا الدراهم قيمة الحطب ما منها وليني في الخلا ما حولي الدومري وبغيت ابلغ الحكومه وليا الحطب ممنوع وذليت انهم يقولون منان جبت الدراهم وانا ما اقدر اخفي على الحكومه شي وان قلت قيمة حطب اخاف يحبسوني
ان شكيت مشكله وان سكت مشكله وقلت ابا اشرفكم ارب انكم تلقون لي حل وسراق الدراهم اكيد انه شايفني يوم اصرها في اللستك وراقبني لين غطيت وسرقني
ربعي يا حبتي اللي سرقني من هل الرياض ما فيها شكه افزعولي وكلن ينشد اللي حوله ارب ان الله يعقل علي حلالي ترى الدراهم تبين على اللي سرقها اما شراله حاجه وشافوها العرب معه والا بينة في عبه وهيه تراها بينه ست ورقات امهات خمس وخمس ورقات امهت ميه وعشر ورقات امهات خميسن وكلهلن علاهن صورة الملك الله يطول عمره
والله لونكم مسروقين في كشب ما تروح بأذن الله اخذوها سويه مني
ربعي ياحبتي
,lhgd ,hpghgd