يا عرب-أحمد فؤاد نجم
يا عرب... يا عرب... يا عرب في أي مصر
يا عرب... يا عرب... اسمعوا صوت شعب مصر
احفظوا لمصر المكان... واحنا عالعهد اللي كان
مصر أوفى من الزمان...
وانتو عارفين شعب مصر
يا عرب يا عرب يا أهل مصر
■ ■ ■
اللي خانوا العهد بينا... واستباحوا كل حاجة
واستهانوا بالعروبة... واستكانوا للخواجة
مستحيل حيكونوا منا... نحنا حاجة وهمّا حاجة
همّا باعوا الجلابية... والوطن والبندقية
واحنا أصحاب القضية...
احنا ما بنبيعش مصر
يا عرب يا عرب يا أهل مصر
■ ■ ■
يطلع الدجال بزيفو... يملا وادي النيل ضباب
ينزل الجلاد بسيفو... يزرع الموت والخراب
يطول الليل زي كيفو... الصباح له ألف باب
واحنا بوصلتنا بإيدينا... ما تخافوش من الليل علينا
مهما غبتوا عن عينينا...
انتو جوّا بقلب مصر
يا عرب يا عرب يا أهل مصر
■ ■ ■
سينا ولا... يافا ولا... حيفا ولا... دير ياسين
اسألوا الشمس اللي هالة... عللي صحيوا مبدرين
يزرعوها نور وغلّة... دول جدودنا ولا مين؟
حقنا وحتماً يُعاد... بس لو بانت سعاد
والبيان ده لوه معاد...
والمعاد حيكون في مصر
يا عرب يا عرب يا أهل مصر
والمعاد حيكون في مصر
والمعاد حيكون في مصر
والمعاد حيكون في مصر
صح لسانك يابو نجم
__________________
ـ
السلام عليكم..لاتغفل عن الذكر ..أذكر ربك ..سبًّح ..أستغفر
ـــ