لو انا مكانك يابو فارس تدري ويش ابا اسوي ابا اصفع الطالب اللي جنبي لأنه هو السبب
تبا موقف صار لي اقولك وتكرم
كان عندنا مدير للمدرسه الله يرحمه ويسامحه اسود من اهل مكه اسمه عبد الصمد علي كنوي وكان زارع في قلوب الطلاب وزارع طماطم في حوش المدرسه ومربي ارانب وكان شديد معنا يضربنا عند اتفه الاسباب المهم انتقامآ منه دخلت انا ومعي واحد ذيابي الله يذكره بالخير اسمه عبد الله مرزوق وكسرنا ارقاب الارانب وحنا منهمكين في عملية الاغتيالات الا وهو واقف على باب الشبك جبهته تقول صفاة ممطوره وقال اطلعن يابنات الكلب وكان معه شاكوش خووي الذيابي طلع من تحت يدينه وفرك وانا اكلتها وصكني بالشاكوش على راسي وليني اشوف النجوم تهاوى على وجهي ويوم رحت علمت ابوي الله يرحمه قال عند ويش ضربك قلت كسرنا ارقاب ارانبه قال تستاهل وقصصنا مع هاك المدرس كثيره لاكن الله يسامحه ويرحمه كنا كل يوم سبت ننشر عنه دعايه انه اكله الكهرب ومات والمشكله انا ما نعرف الكهرب ويش يعني وبعد مده فعلآ صعقه الكهرب في غساله كان يشتغل فيها في بيته في مكه حسب ما روي لنا
الركب واجد يابو فارس موعدنا في حلقه قادمه نكمل حكاياتنا مع هاك المدرس