قصيدة لشاعر القدير / محمد بن شاعي بن عبيد بن جريس الغنامي
لا والله الا قربت نقلة الطير
وانا ما عندي طير لا وحسوفه
طيري غدا ورى الحباري المعاشير
غدا وراهنه وعيني تشوفه
ياما على شانه ضربت المشاوير
ولا قلت فالطرقه عليه كلوفه
قنصت به فارض زهور ونواوير
والصيد مشبع مخلبه من صنوفه
طيري عن الطيور اله ميزة غير
قليل وصفه لو اعدد وصوفه
من الدم ما ينقه مثل سالم الزير
ولا يعتذر لو هي صعيبه ظروفه
نادر حرار ومنوة للصقاقير
افجح هجر ساطي كبار كفوفه
قرناس لونه مثل لون المغاتير
وافي ولون الراس زايد كشوفه
راكد على التكاي ماربط له السير
طلعه وكاد وصيدته ما تطوفه
يطلع على برق الدواغر مخامير
وان قابل الحفال صرم كتوفه
وان زوعن فالجو برق الدواغير
وتنحرن درب الهوى والحفوفه
رقا لهنه فوق ثم جاهن مغير
وحول عليهن والمخالب سيوفه
دورت له واتعبت معي المداوير
ودفعت من مالي على ذكر شوفه
وقطعت منه الياس عسى العوض خير
وعقبه عن المقناص نفسي عزوفه
rvkhs g,ki leg g,k hglyhjdv