هات القلم والعلم مع دربه اعلوم
علم وعراف العرب يكتبونه
تدرون وش الكارثه في هذا اليوم
العالم اللي علمهم يجهلونه
واكبر امصيبه كان ماتقدر اتقوم
اليا انسدح حظك وزادت اديونه
واكبر من الثنتين لاصرت محروم
ثم اختلف مشي القدم عن اعيونه
وام الكباير صحبة الصقر للبوم
المال خلى ماكر الصقر دونه
كم واحدن في عتمة الوقت مظلوم
عليه ثوبه قاصرن عن زبونه
عينه تشوف الدرب لكن منجوم
نجمن هل الارصاد مايعرفونه
وكم واحدن رجال في بشت وهدوم
واليا دخلته فيه سبعن تخونه
منت بعلى غرات الاجواد ملزوم
كلن بقايا للحم في سنونه
لحيه عليها ريحة الصبر والثوم
ولحيه طويله مار صدق امحسونه
وكم واحدن في مامضى يجمع الدوم
قوته على مايجمعه من امتونه
واليوم كنه حاكم الفرس والروم
مايدري انه ساس عرقه مهونه
لو ان ابه قسمن من الارض مقسوم
ويحرم على الانذال ماياصلونه
ويصبح شعاع الشمس مادونه اغيوم
وكلن على شكله وكلن ابشونه
حتى اروبضة العرب تترك الحوم
وكلن على قيمة طيوره يجونه
بيتن ربيع وبيت مهوب مرحوم
صبخى وحساد العرب يسكنونه
يالله يامعبود ياحي قيوم
مدك ولا مدت يدين العفونه