حملة وقالوا داخلن بطنها الفيل
ولدت وجابت نفصف بيضة دجاجه
وقالوا هنياله يبا يشرب النيل
وعود بجال البحر يشرب هماجه
وقالو يجيه الغيث جيلن بعد جيل
والغيث عود في الحقيقه عجاجه
شوف الرعد يرعد ولا يمشي السيل
والوقت يدرج والبلا في ادراجه
وقالوا حلمله حلم في تالي الليل
فرخ الحرار اصبح فروخ الزراجه
وكبر براس الماذنه قبل تهليل
وكلن ركب راسه وراحت لجاجه
ولف الرشا من فوق حدب المحاحيل
وفارق لذيذ النوم عقب ارتهاجه
واليا بغيت اتسوق بيض الفناجيل
تحرم على اللي مايرحب احجاجه
وإليا نصيت انص الرجال المشاكيل
اياك ويا النذل يطريك حاجه
وإليا وطاك امن الليالي غرابيل
الصبر مفتاح الفرج وانفراجه
ولو شوف عينك مثل شوف الدرابيل
إليا مرض قلبك إصعيبن إعلاجه
لابد دورات الليالي مقابيل
تلعب بصاحبها كما لعب عاجه
الجدي ماهو مطلعه مطلع اسهيل
وهرجن بدون اثبات رده سماجه
والبدر ماهو يشبه النجم ابو ذيل
الجهل ظلما والمعرفه اسراجه
والدرب واضح وأثر خيلن بأثر خيل
يدله الشاوي مربي نعاجه
والدرب معروضه عليها القناديل
ماضاقت الدنيا وساعن افجاجه
وعندي كلام الطيّب من الرجاجيل
مثل الذهب مخزون وسط الزجاجه
والا الردي دايم علومه دهاويل
مثل المحرج وسط لجة حراجه
والحيل لله ثم للي له الحيل
اللي ليا ثقل الحمل عنه ماجه
ولا الضعيّف ستر عينه مناديل
نوبن بها مسلم ونوبن خواجه
الكحل يعبا للعيون المظاليل
والشب هو طب العما والعواجه
اخترت ما يختار زين التماثيل
سيست بنيانه طويلن اسياجه
قافن وعن نقد اللواعيب ماطيل
وكلن على ماقيل يلقى خراجه