الهنوف الي ملت قلبـي وحلـت فينـي

سرهـا عنـدي وخـل العالـم البلاسـه

درةٍ مصيونـةٍ عـن كـل شـيٍ شينـي

تا خذ العقـل بمباديهـا وتمـلا راسـه

عيبهـا فـي جاذبيتهـا تبـي تفنينـي

املكت قلبي بـدون مفاهمـه وسياسـه

قصةٍ والله عجيبـة والبطـل شخصينـي

اوجزت احداثهـا مـن دون أي دراسـه

أذكر اني قلت وصراع الهـوى يطوينـي

والمكان تقول لبسـه السكـون الباسـه

يابعد كل أصدقاي ومن تشوفـه عينـي

امهليني بس لين أشرب بقايـا الكاسـه

جيت مثخن بالعطش ومشاهدك يروينـي

كيف لو صدري على صدرك يحس انفاسه

لو اظن أن جيتي يمـك تبـي تغوينـي

كان كنسلت المقابل واللقا مـن ساسـه

والله اني حاشمك عن نهج موسو لينـي

وحافظك حفظ البخيل لتجرتـه واكياسـه

يوم جيتك قـام يجذبنـي شعـورٍ فينـي

صرت صادق حس وانا قبل ماش افراسه

قام يرقص لك خفوقي وامسكـه بيدينـي

مثل حـرٍ تـل مسباقـه وحـرك راسـه

كنه يسابـق لشوفـة زولكـم رجلينـي

والضلوع العوج من دونه سجن واحراسه

جملة اوصافك عـذاب وكلهـا تغرينـي

مثل ماتغري الـورود العالـم الحساسـه

صرت لافكـرت تفكيـري يجمـد عينـي

وينتظرني النوم لين يضيع حلو نعاسـه

لا يمي في حبـك اعـده مـن الغادينـي

مايفرق بين مسبـوك الذهـب ونحاسـه

للبحر فيك السكـون وروعـة التكوينـي

وللمطرفيك العذوبه والشـرف واوناسـه

ومن عفافك ستر ودروعٍ تبـي تحمينـي

فوق دين وعرف وزيادة حيـا واكياسـه

ومن كلامك سحر بابل أو خمـر دارينـي

ومن جمالك ظاهره منها البشر منحاسـه

لويشوفك عابدٍ شـارف علـى الستينـي

دق قلبـه للحيـاه وللهوى مـرواسـه

ولو تمرين بدوي راعـي نيـاق ودينـي

يحترق بنه ويرمي مـن يـده محماسـه

ولو يشوفك (دانتي)ماجاب لـو حرفينـي

يرجع بخفـي حنيـن ويقطـع الكراسـه

ولو (نيوتن) يلمحك بيصير لـه قولينـي

قال أسـاس الجاذبيـه عينـك النعاسـه

ولو نظرك أدولف هتلر صاحب التمكيني

كان ماعدوه بارز مـن كبـار الساسـه

ولو رميتي بيتهوفـن ضيـع التلحينـي

وأعلن بدنيا الموسيقا واللحون افلاسـه

عذبينـي بالبعـاد وعـودي واحييـنـي

مثل مايحيي الهميل من الشجـر يباسـه

وزعليني ياغلاتـي وارجعـي راضينـي

واغمريني في حنـان القامـه المياسـه

والله اني مثـل وادٍ لـه ثمـان اسنينـي

ينتظر هامي السحاب ويرتجـي رجاسـه

كل مايشرق صباح اهديك دمعـة عينـي

مع عبير العود والجوري ونفحـة آسـه

شوفتك تنعش عروق الجسـم وتهدينـي

فرجي لي من هواجس فكري ووسواسـه

تبت عن غيرك وجيتك مثـل ماجيتينـي

ياكسجين الروح يفديك الغـرام وناسـه

اتركيني من سواليف الوحـل والطينـي

وحدثيني عن حديث الجوهـره والماسـه

قد حلفت برب يوسف والفلـق والتينـي

انك اجمل من ذوات البشـره الحساسـه