خلاص للشّعر والشعّار مالـي مـزاج
غنيّت لين القريحـه شابـت عيونهـا
كم بنت فكرٍ بعد ما أعقد عليها الزواج
طلقّتها بالثـلاث وساقـت ضعونهـا
أنتجت ديوان .. لكن وش حصيل النتاج
كلام مصفوف .. وبضاعه بكرتونهـا
ماعاد تنسام لو تعرض بسوق الحراج
لوّ أنّها غاليه من طيـب مضمونهـا
و صبيّت دم الذيابه في حلوق النعـاج
وقامت عليّ الوعول تطـوّل قرونهـا
ما أداني البهرجه والدحرجه فـالعجاج
وناس ٍ لحبّ الظهور .. تحزّم بطونهـا
كذاب من قال لي فـالشّعر فلّة حجاج
في خاطري ضيقة ٍ تمشي على هونها
أعالج الوضع وانا اللي بحاجة عـلاج
شيّبت وأحلامي السوداء على لونهـا
يا رب تستر على نفسي من الإحتيـاج
لي رغبة ٍ يستدير الحظ مـن دونهـا
"""""""""""""""""""""""""""""""""""""""""""""""""" """"""""""
لا يا صغيرّ فالهوى لازلت فـي عمـر الزهـور
وشلون تنسى كلمتك (علـى المحبّـه ربّنـي)
خبيّتك بقلبي وأنا فالحـبّ مـا أحـبّ الظهـور
وأبسط حقوقي يا بعد عيني فـي عينـك خبّنـي
سياستي فـ الحبّ مابيـن التواضـع والغـرور
المنبنـي مـا ينهـدم والمنهـدم مـا ينبنـي ؟
يمكن ليا ضاقت عليّ الارض أطير مع الطيـور
وأشكي عليها مـن غرامـك والهبـوب تهبّنـي
آخر ( أحبـك) قلتهـا دمـك عليهـا لا يفـور
أمّـا عليّـه صبّهـا .. وألاّ عليهـا صبّنـي ؟
خل الحزن يجرد حسابه مع وسيعيـن الصـدور
عذّبت حالـي يـوم تمدحنـي ويـوم تسبّنـي !
دربك خضـر والله يوفّقـك السعـاده والسـرور
عز الله أنّي جزت عقبك عن هـوى كـل البنـي
"""""""""""""""""""""""""""""""""""""""""""""""""" """"""""""""
هيجن يا قلبي وأنـا ويـاك
كل ٍ يهيجـن علـى الثانـي
أكيد معنـاي فـي معنـاك
مربوط وألحانك .. ألحانـي
غن وتوّكل علـى مـولاك
وأشيل نبضك على لسانـي
يا صاحبي ما قويت أنسـاك
حتى ولـو فقـدك أعيانـي
طيف ٍ نقـل طلّـة محيـاك
وصلـنـي ولا تـعـدّانـي
شوقي لك القاسـي الفتّـاك
لا مرّنـي هـزّ وجـدانـي
غلاك مـا يحتمـل فرقـاك
أن رحت وأن جيت تلقانـي
أزعل واشيل الهوى لرضاك
وأقـول يـا سيـد خلاّنـي
لو تفتح بخاطـري شبـاك
تشوف وتعرف وش جانـي
( عوّدت عيني على رؤياك )
ولا تعـوّدت تنسـانـي !!
"""""""""""""""""""""""""""""""""""""""""""""""""""""""""""""
النفس ومّاره .. والإنسان طمـاع
والشرّ له بيـن العوانـي عوانـي
وأنا ليـا دوّرت للقـاف مطـلاع
إيعزت للي مـا خبرتـه عصانـي
شاعر وأعرف الشعر بيبان وأنواع
أمّا هجيـت أبليـس وإلاّ هجانـي
من فضل ربي يا مضيّعة الأسنـاع
أقولها واللـي حرمكـم عطانـي
يا اللي تدوبحها على روس الأكواع
الدوبحه .. ما سـرّت الدوبحانـي
بضاعتك ما بيـن سايـم وبيـاع
بـادت تناقلهـا قصـار اليمانـي
عز الله انك من خبيثيـن الاطبـاع
ولسانك أملس مثل ظهر الحصاني
أرفع عيونك للسماء وأهبد القـاع
ماعاد لك بين النشامـى مكانـي
ماهوب انا اللي يستلف مدّة الصاع
ويأخذ مداده مـن فـلان وفلانـي
أهرج مع العاقل بمنطوق الإقنـاع
واقرا على المجنون سبع المثانـي
وإلا انت طير ٍ لا بلع لقمتـه زاع
حتيش لو ريشك مـن الزعفرانـي
تكفخ بجنحانـك ورا كـل مذيـاع
ملمّعينـك شـلـة الديشـرانـي
عرضّت وجهك للواهيب ثم مـاع
خله يميع وشوف لك وجه ثانـي
وإليا كسبت إعجاب الامه بالإجماع
ماهي غريبه معجـزات الزمانـي
زمّر وقل عندي مفاتيـح الإبـداع
وأعزف على المزمار كل الاغاني
وااا قلبك اللي رابض ٍ بين الأضلاع
ما راعه إلاّ مطرق الخيزرانـي !
"""""""""""""""""""""""""""""""""""""""""""""""""" """"""""""""""""
نعرف الطيبين من الرخـوم
وانت مخلوق طيّب وإرخمـه
مير لاجـاك خمّـام العلـوم
لا يخمخمك لين إتخمـخمه !