مثواك بالهـمّ يـا بغـداد
وأنتي من الحزن مخلوقه
..
وقف لك الموت بالمرصاد
وغنّى لك الـدمّ طاروقـه
..
ماضيك في معصم الجلاد
اللي رحل عنك بحقوقـه
..
وحاضرك مابه علوم جداد
عنك التباشيـر مفهوقـه
..
عز الله انك بـلاد أمجـاد
وحضارتك غير مسبوقـه
..
لكنّ شعبك خليـط أجـواد
عاشت على الغشّ والبوقه
..
من تركمان وعرب وأكراد
وسلايل ٍ جـات ملحوقـه
..
بقلوبها تـزرع الاحقـاد
لو تنثر الشمـل وتحوقـه
..
مجاهدين ويبـون جهـاد
كل ٍ ودينه على ذوقـه !
..
و جارك يصوّت لهم بإمداد
بشّار أبو دقـن محلوقـه
..
حزام ناسف للإستشهـاد
للبيع معروض في سوقه
..
سيناريو المذبحـه ينعـاد
والمقبره ما لهـا طوقـه
..
سيادة الامن يـا الاسيـاد
من سدّة الحكم مسروقـه
..
والرافضي لو يسود بـلاد
عمامته عشعشت فوقه !
"""""""""""""""""""""""""""""""""""""""""""""" ""
يا الله دخيلك كلّ ما خيّم علينا الإنبساط
قامت دواليب الهموم تعكرّه وتشوحنا
مدري تخاط جروحنا ونطيب وإلاّ ما تخاط
شابت نواصينا ندوّر عن علاج جروحنا
متى يفكّ الياس كل الناس ويحلّ الرباط
على ترانيم الرجاء غنّت حمايم دوحنا
يا طيبنا طيباه في سرد الدوادي والخراط
ما غير نبني بالعلوم الزايفات صروحنا
أغلب سوالفنا خليط من التباهي والهياط
قمنا نصبّ الفلسفه من صمتنا في بوحنا
من البلاط نشيلها ونحطها على البلاط
ونثبّت المعلاق للأطباق فوق سطوحنا
وعلى سفينه نوح ناقشنا فتاوى الإختلاط
ومن حقنا هاذي سفينتنا .. وهذا نوحنا !
يا ربّ تهدينا الصراط اللي ما جاء مثله صراط
وأنت الغنّي المغتني عن ذمّنا ومدوحنا
"""""""""""""""""""""""""""""""""""""""""""""" """"
جتني عزيمة شات مـدري كيـف جـات
مذيّلـه بإسـم ( الشجـون المغتـرب )
..
وفي وسطها بعض الرمـوز المبهمـات
والبـاك بأوّلهـا .. وبآخرهـا بــرب
..
عنوانهـا مكتـوب مـن سكّـر نبـات
ومضمونها ماخـوذ مـن حـيّ الطـرب
..
أكبـر تجـمّـع للشـبـاب وللبـنـات
في شاتنـا اللـي تعرفـه كـلّ العـرب
..
يـا التافهيـن مسامريـن التافـهـات
لو يدخل الصالح فـي سمرتكـم خـرب
..
ماعندكـم غيـر العـلـوم الخايـبـات
هات القرب .. حطّ القرب .. شيل القرب !
..
ولكم .. وأحلى مايـك بيـن المايكـات
و من عاشر الجربـاء تعشّـاه الجـرب
..
أبليس لا أمسى الليـل سـاق الغاويـات
وشبـك لهـن محبالـة الشـرّ وهـرب
..
لـو يعرفّـن الباقـيـات الصالـحـات
ما أكل عليهن تالـي الليـل وشـرب !!
""""""""""""""""""""""""""""""""""""""""
أيه أنا أكبر فوضوي .. وأكبر مزاجي
والمزاجـي مـا يكـبّ الفوضـويّـه
لا تناقشنـي وأنـا عاقـد حجاجـي
صدّ عنـي وأتـرك الشرهـه عليّـه
لـي طبـوع ٍ مـا تغيّـر بالتناجـي
راسخـه لـو تعتبرهـا نرجسيّـه !
من ملامح وجهي أبديـت إحتجاجـي
آخذ من الصمـت توثيـق القضيّـه
أكتب بنظرات عينـي ويـش لاجـي
في ضميري .. بالحـروف الأبجديّـه
تحسب ّ أني غاوي ٍ ما أعرف خراجي
يـوم مـا أردّ الخطـيّـه بالخطـيّـه
قاسي وراسي حجر ماهـو زجاجـي
ما يهـاب مـن الريـاح الموسميّـه
يوم هبّـت وأزرت تثيـر إنزعاجـي
أستـدارت بالـسّـلام وبالتحـيّـه !
"""""""""""""""""""""""""""""""""""""""""""""" """
كظمت غيضي وأنا زعلان
عليك .. مدري على روحي
ما ودّي أشرّع البيبان
وأعاتبك وأنبش جروحي
قلبي تعوّد على الكتمان
ماهوب بأسراره يبوحي
لا عاد تنشد من الغلطان
غلطان انا .. وانت مسموحي
حقّك على قلبي الولهان
اللي لا ناداك ما توحي
أسقيتك من الغلا هتان
وقام الجفاء برقه يلوحي
أكرمتني والكريم معان
رح بلّغ طيوفك تروحي
خلّك على خانة النسيان
حجزت لك رقم يا روحي
أسلم وسلّم على الخلاّن
مالي ورا الحبّ مصلوحي !!
"""""""""""""""""""""""""""""""""""""""""""""""""" """
يا سيّد كبار رجال الأعمال
وشاهبندر السوق المحلّي
تناطح براسك روس الاموال
وسهمك بالأرباح متعلّي
عليك المدوح ألوان وأشكال
وتآخذ من المدح وتخلّي
لو أنك تمرجل منت رجّال
مراجلك كذبه مير يا اللّي
تسوق الدراهم سوق جمّال
ما تنفعك .. دامك ما تصّلي !