يا بنـت .. خلّـي قصيـدي لا تغنّينـه
ماهوب مقبول .. بأصـوات البنيّاتـي
صحيح صوتك على ما قيل .. يا زينـه
وله ميزةٍ فارقه عـن كـل الأصواتـي
البحّه الناعمـه مـن صلـب تكوينـه
لا قبلها راحت .. ولا بعدهـا جاتـي !
وأن كان يـا بنـت مجبـوره تجرّينـه
جرّي من أبيات غيري .. خليّ أبياتـي
يصعب على مثلك وشـرواك تلحينـه
صوتك رومانسي .. وأنا صلفه عباراتي
وش لازمـك يـوم بلسانـك تعدّينـه
يا قرب غاياتاك .. ويا بعـد غاياتـي
لو عاقل النـتّ مـا يربـط مجانينـه
زادوا عليـه المهـبّـل والهبيـلاتـي
روحي في حالك .. وحالي بينك وبينـه
خطوط .. وحدود .. وسدود ٍ منيعاتـي
خليّني أكتب عـن اللـي مـا تحبّينـه
وأمارس أغلى هوايه مـن هواياتـي !
"""""""""""""""""""""""""""""""""""""""""""""
والله ما أتابع شاعر المليونـي
ولا لي معه .. لا حسنه ولا سيّه
عاقبتنـي يـا نافـخ البالونـي
وأبلشتنـي بالنشـده اليوميّـه
تقول شفت الشاعـر المجنونـي
يوم أنقزت من عينه الجنيّـه ؟
وأقول شفت أنك على ما لونـي
لاهي .. ما بين الميّته والحيّه !
عندي عباره تشرح المضمونـي
وتناسبـك بالـوزن والقافـيّـه
( مافيه حيله ) مدفع الصهيوني
وأكبر دليل ( الصوره الرمزيّه )
""""""""""""""""""""""""""""""""""""""
شبعنا شعر .. مـن كـلّ الموايـد
وملّينـا مـن لـحـون القصـايـد
طفحنـا ليـن صحنـا مـن غثانـا
قنـوات .. ومجـلات .. وجـرايـد
يعيـش الشّعـر طفـره عالمـيّـه
تضخّـم ميـر مـا منـه فـوايـد
عدد جمهور شعـر العـام ناقـص
وعدد جمهور شعـر اليـوم زايـد
طلع له جيـل ثانـي غيـر جيلـه
جـديـد ولا يجـيـب إلاّ الجـدايـد
تهـزّ الـروس وتـمـدّ الأيــادي
وتكتب من خوى راس .. وخوى يد !
وعاثوا فيه قـوم أفـزع وصـوّت
وجاملنـي علـى كـثـر النقـايـد
ليـا شالتهـم رقـبـة الـزرافـه
يـا طيـب اللـي يلبسّهـا القلايـد
لو ان الشعـر لـه قـدر ومعـزّه
مع أهل المعرفـه وأهـل العوايـد
بعد مـا ضـاع عـزّه عزّتـي لـه
عسى ما عـاد يبقـا لـه شرايـد
""""""""""""""""""""""""""""""""""""""""""""
يا طيبك .. ويا كثر ملحك .. وزينـك
تجمّعـت فيـك الخصـال الحميـده
لاجيت أغنّي فيـك قمـت أستدينـك
آخذ من وصوفـك لبـدع القصيـده
ومن خوف تتبع جرّتـك مهتوينـك
ماودي أسهب بالوصـوف العديـده
ذوقك .. وتفكيرك .. ولطفك .. ولينك
كلّك علـى بعضـك عبـاره مفيـده
بالشكل والمضمون هايـم ضنينـك
القلب زاهـي .. والقوالـب فريـده
عـز الله انـي فالمحبّـه رهيـنـك
اللي مـا ودّه يطلـق الحـبّ قيـده
أسلم وسلّم لي على رمـش عينـك
وقلّه .. متى يسمح بفرصه سعيده ؟
الله يديـم الـودّ بيـنـي وبيـنـك
ومـن بيننـا تبقـا المحبّـه مديـده
"""""""""""""""""""""""""""""""""""""""""""""
ذعذعي وأسعفينا يا هبـوب البـراد
راحت الأرض من حرّ الهوا حاميـه
ليت ما لك مواسم من جماد لجمـاد
وأرضنا مشلهبّه .. والسماء ساميه
كيف ننعم ونسلم من عيون الجـراد
نزرع الخوخ وإلاّ نزرع الباميـه !
إحتباس الحراره وأزمـة الإقتصـاد
علة ٍ فـي نمـوّ الدولـه الناميـه
سعر برميل نفط المنطقه يـوم زاد
صبّوا النفط داخل حقـل الألغاميـه
التضخمّ وميثـاق الأمـم والجهـاد
الثلاثـه علينـا جـات مترامـيـه
الجروح الجديده ما عليهـا ضمـاد
والجـروح القديمـه كلّهـا داميـه
و قبّة البيت الأبيض مغتشيها السواد
مير سـوره كبيـر وقبّتـه زاميـه
يا الله أنّك لا تنصر عبد رب العبـاد
كان سلّط علينا عبد الأصناميـه !!