كذاب من قال لي خضـر ٍ مرابعنـا
الأرض جردا وفيها الخلق مذنوبـه
و الغيم لا مرّ وأقفى .. ما يوادعنـا
ـأسدل علينا الخصام وراح بدروبـه
نستغفر الله بعـد كثـرت مواجعنـا
ـونرزح ما بين الوجع والذنب والتوبه
في زحمة اللذه المستفحلـه ضعنـا
ـنمسي في دوامه ونصبح في غيبوبه
ومثّلث القافيـه والـوزن والمعنـى
ـمقلوب والساحه أم الشعر مقلوبـه
قام ابو منكوس بالمنكـوس يدفعنـا
ــوقام ابو مسحوب يسحبنا بمسحوبه
والشّعر سقنا ركابـه للشّقـا معنـا
ـقمنا نشمّر كمومه وأنفتـق ثوبـه
ومسابقاتـه تفرّقنـا .. وتجمعـنـا
ـوالفزعه الغالبه ماهيـب مغلوبـه
هـذا ممثـل قبيلتـنـا ومبدعـنـا
ـاللي عليه البطايق جـات مجلوبـه
وهذا ما نعطيه شي ٍ مـن ودايعنـا
ـحتيش لو يصنع الإبـداع بأسلوبـه
بدو .. ومع ربعنـا تفـزع ربايعنـا
ـالرجل وانكبته .. والبنـت منكوبـه
رحنـا بضاعـه لشارينـا وبايعنـا
ـوالعمله اللي مع التجّار مضروبه !
"""""""""""""""""""""""""""""""""""""""""""""""""" """""""""""""
همزة وصل بين حال وحـال
حطّت على صـدري مطمّـه
الحـبّ فالحـلّ والتـرحـال
ماعـاد تبـرا بـه الـذمّـه
العـام فـي قمّتـه نختـال
واليوم طحنا مـن القمّـه !
وراك يـا صاحبـي تغتـال
قلبي بعد ساق لـك همّـه ؟
ما تدري أنيّ على مـا قـال
سقاني الهجـر مـن سمّـه
أصنع من السلسله سلسـال
وأقـول تـمّ الوصـل تمّـه
وش جاك فآخر ثـلاث ليـال
ليت الغلا مـا ثقـل دمّـه !
ماعاد تحرص على الجـوّال
يـرنّ مـا تلتفـت يـمّـه
وأنته منـوّل بـدون جـدال
يخمّـك الشـوق وتخـمّـه
تخدش حياء هيبـة الرجـال
ويدسّها من تحـت كمّـه ؟
لكـنّ رغـم الجفـاء لازال
جوارحـه فـيـك مهتـمّـه
عسى العوض في شهر شوّال
تنزاح عـن جـوّه الغمّـه !
"""""""""""""""""""""""""""""""""""""
الورع يلعـب بالملاييـن
و يشـب بالتبذيـر ضـوّه
سموّ شيخ من السلاطيـن
ولا بارك الله فـي سمـوّه
يبذخ على روس المغنيّـن
شال أسفله علـى علـوّه
ويوزّع جيوب وصواليـن
شي ٍ قديـم وشـي تـوّه
يضحك ويرمش بارد العين
لو يمدحه شاعـر مفـوّه
ويمدّ له وحـده و ثنتيـن
شرهه خصوصيّه وخـوّه
في محفل ٍ خارج عن الدين
فيه الأدب وجهـه مشـوّه
أركوا عليه مدوحهم ليـن
تفجـرت فيـه الـمـروّه
يا كذبهم كذباه يا حسيـن
حطّـوا هلامتهـم فتـوّه
وين اليتامى والمساكيـن
عن رعـده وبـراّق نـوّه
لو يفزع لنصرة فلسطيـن
قل بارك الله فـي سمـوّه
""""""""""""""""""""""""""""""""""""""""
عليك حقّـي كـان .. طـوّل تغليّـك
وعليّ حقك كـان .. منتـه بغالـي
لا تختبرني تحسب أنيّ مـا أراعيـك
وأنـا نمـوذج للحبيـب المثـالـي
مبرمـج ٍ قلبـي يحبّـك تماتـيـك
حاسب طبيعي ماهو بحاسـب آلـي
لا ضخّ دمه بيـن ذكـرك وطاريـك
لا عاد تنشـد عقبهـا كيـف حالـي
أروح فـي دوامـة ٍ مـن تجافيـك
وأستحضر اللي حافظه فـي خيالـي
صوتك .. وضحكاتك .. وقسوة تعاليك
همسك .. وحدّة لهجتك .. وإنفعالـي
عينك .. ودمعك يوم تزعل واراضيك
صمتـك وتفكيـرك بسـود الليالـي
غيرتك لـو مافيـه حـي ٍ يحاليـك
حيرتك ما بيـن الجفـا والوصالـي
كم كلمـة ٍ خبيّتهـا عـن محاكيـك
ـوكم كلمة ٍ في خاطـرك قلتهـا لـي
إليا تركتـك قلـت بانـت مواريـك
وإليا سألتك مـا تجـاوب سوالـي !
أقول وش فيّه .. ولا قلت وش فيـك
ـياما وياما .. مـن غرامـك جرالـي
اشياء كثيـره تثبـت انـي مهاويـك
أزريـت أحـلّ معقّـدات الحبـالـي
تغيب مـا علّمتنـي ويـن أراضيـك
ـوالهجر حاظـر والغيـاب ارتجالـي
الشـوق يدفعنـي لحضـرة معاليـك
يا اللي غرامك زاد فـوق إحتمالـي
خف ربـك بقلـب ٍ يحبّـك ويغليـك
ماهو حرام الحبّ .. يا بن الحلالي !
""""""""""""""""""""""""""""""""""""""
الناس خلق اجناس وألوان وأشكال
ومن كثر أساميها يشيب المسمّـي
بعض البني في صدرها قلب رجال
وبعض الرجال قلوبهم وش تظمّي ؟
هذا وانا لازلـت طرقـي ورحّـال
أزهم هبوب الشوق وتهـبّ يمّـي
وأن حبّني عميّ على حبّة الخـال
أضحك وأغنيّ بين خالـي وعمّـي
""""""""""""""""""""""""""""""""""""""
أبتلشنـا فيـك مـدري نمدحـك وإلاّ نسبّـك
وأنـت للثنتيـن والـم للمسبّـه والمديحـه
مير خلك نكرهـك يوميـن والثالـث نحبّـك
والله يعينك تدوّر عـن مشاعرنـا الصريحـه
لا تخاف الناس يا حسّاس لكن خـاف ربّـك
وأعرف أن العمر فاني وأنما الدين النصيحـه
ما قصدنـا بالقديحـه يـوم شلناهـا نشبّـك
خابريـن اللـي يشبّـك لا زنـاد ولا قديحـه
ودّنا نعطيك علم ٍ تنقلـه فـي وسـط عبّـك
ـلإجل ما تمسي وتصبح من مصيبه في فضيحه
أنتبه وأعرف مقامك والهبـوب اللـي تهبّـك
شمّها يمكن هواها يبري النفس الجريحـه
"""""""""""""""""""""""""""""""""""""""""""""""""" """""""""""""""""""""""""""""""""""""""""""""""""" "
شعري يابنت الليل ماهوب مرخوص
ولا ينكتب فـأم العلـوم الرخيصـه
بدع ٍ عليه رسوم وختوم وفصوص
منه أكثر الشعّار راحـوا خبيصـه
منتي بكفوّ له يجي فيك مخصـوص
يا اللي بسم الداب طحتـي قريصـه
فوقك حناشل قوم ومخاتل قنـوص
صيد ٍ شبع طيره و ذيبـه ونيصـه
لك سيرة ٍ ياشينها يا أم عنقـوص
تنحّري يوسف وقـدّي قميصـه !