خلّ السياسه تستعدّ وتستريح وتستدير
يا موجز الأخبار سلّم لي على تفصيلها
،
مانيب يمّ اللّي حصل واللّي بعد يمكن يصير
جوارحي مشغوله بمنتوقة ٍ تومي لها
،
الجادل اللي تلّني لعيونها سلك الحرير
قامت محاجرها تحاصرني وتسرج خيلها
،
أفرد لها صدري وأقلّـطها على الضلع القصير
حطيتها بين الضلوع ولا قدرت أشيلها
،
الله خلقها عن بنات الجيل فيها طبع غير
والطبع خلاّها بعيني فارقه عن جيلها
،
بالشكل والمضمون فازت ربّة الحسن المثير
واللي تنافسها على عرش الحلا يا حليلها !
،
أحبّها .. والحبّ مستكبر وأنا قلبي كبير
يمنعني أحكي عن غرابيل الهوى وأشكيلها
،
أخشى عليها من زمان ٍ فيه شرّ وفيه خير
وأخاف منها بين عدلات الليال وميلها
،
إليا عرض لي طيفها خبيّت مكنون الضمير
وغمضّت عيني ثم نطقت بهمس .. يا حبيّ لها
"""""""""""""""""""""""""""""""""""""""""""""""""" """"""""""""""""
ما قدرت أنساك يا الحبّ القديم
لا أختليت بوحدتي تطري علي
^
أتوغّل في تفاصيلك وأهيم
مع حكايات الحبيب الأوّلي
^
ذكرياته لو يذبّن الخريم
عوّدن يملن ّ تفكيري ملي
^
صورته لا هب ذعذاع النسيم
حلـّت بعيني وعيـّت تنجلي
^
لا يزال الحب في صدري مقيم
والجفاء القاسي يغيض ويمتلي
^
لا ذكرته قلت والله العظيم
ما يعوضه لا شبيه ولا حلي
^
من يقول أنّ العذارى سيم سيم
أشهد أنّه سالي وقلبه خلي
^
أنصح اللي ما عرف عشق الحريم
ينتبه في حبّهن لا يبتلي !
"""""""""""""""""""""""""""""""""""""""""""""""""" """"""""""""
الهجوم المفاجىء
يا اللي ترد العلم وترزّ الأعلام
سولف وأمانه لا تعكرّ مزاجي
//
قليّ علامك ليه وأقول منضام
والضيم علّه ما نفعها العلاجي
//
تقول لاجمني عن علومي لجام
ومن عقدة لساني تعقّد حجاجي
//
تجمّعت في صدري وراحت أقسام
وأزريت أمدّ الشوف وأعرف خراجي
//
مغير أغنيّ مع ذعاذيع الأنسام
وأعلن على صفق الهبوب إحتجاجي
//
شاعر ولا أدري كيف حطمّت الأرقام
ومعناي في بعض البيوت إزدواجي
//
ثبتّ تاجي فوق راسي من العام
وأخاف أهزّ الراس .. ويطيح تاجي
//
آخذ من أحداث الزمن مصدر إلهام
مرجوج .. وأحداثه تزيد إرتجاجي
//
وكسبت معلومه على مرّ الأيام
بين السياسه والنجاسه تناجي
//
يزمر علينا بوش ويصيح صدام
يا الله تكافي شرهم يا مناجي
//
لعبه خبيثه .. مالها شرع وأحكام
تضيق منها واسعات الفجاجي
//
مصالحن مابين بايع وسوام
منتوجها جلب العرب للحراجي
//
صفارة إنذار .. وطواري وكماّم
وخطـّـه لـ تطويق البلد بـ الملاجي
//
نصب حقل النفط في حقل الإلغام
ونفتح منافذ فـ الشريط السياجي
//
ونمشي خلاف ونظرة العين قدام
من خوف يلحقنا الهجوم المفاجي
//
ونستورد من الهند والسند خدام
ومن العراقيين .. مليون لاجي
//
وبكره تبثّ العلم شاشات الأعلام
طار الحمام .. وبيضّن الدجاجي
"""""""""""""""""""""""""""""""""""""""""""""""""" """""""""""""""""
يا حبيبي ليه تزعل يـوم أعاتـب وأتشـرّه
هدّ روعك .. والعتب ملح العلاقات الحميمـه
أسمح لقلبي وخلّـه يشتكـي منـك المضـرّه
لا تغانم خاطري بالضيق يـا مـال الغنيمـه
أيه أحبّـك والمحبّـه مـع جنابـك مستمـرّه
ولا يعكّر صفوها غيـر التمـادي بالظليمـه
تفرض الغيره عليك أحكامها فـي كـل مـرّه
وتعزف الريبه لحنهـا واللحـن دقّّـه قديمـه
لا تزعزعك الهقـاوي والحقيقـه مستقـرّه
لو يحوم الشك فوقك ما بقـى للحـبّ قيمـه
يوم قلت الشـوق جايـر قلـت لـي لله درّه
خله بقلبـك يزيـد وياعسـى ربـي يديمـه
قلت طيب هاك حبّك .. وأكفني خيره وشـرّه
وأستدرت تسوق غيضك كنّي مسوّي جريمه !