قالت : (أكتب شعر) في الحسن المثير
وانت شاعر طيّب وفيك ابركه
..
قلت: شقّ الجيب هذا ما يصير
مسلمه يا بنت والا مشركه ؟
..
قالت : الموضوع يا سداح غير
أعتبرني رسمة ٍ متحركه !
..
مير عندي شرط يا الوجه السفير
لا تجيب القافيه مستهلكه
..
وفرّعت والله على خلقه بصير
وأنفخت في علكها اللي تعلكه
..
قلت : بسم الله وهاك من الأخير
ما هقيت الشين غيرك تمكله
..
ملتوي خشمك تقل منقار طير
وجاحره عينك تقل عين سمكه !
..
وفمك من وسعه عبوس ٍ قمطرير
والثنايا طول برج المملكه !
..
واستدارت تندب الحظ الكسير
وقصدها عيّا قصيدي يدركه
..
يستر الله حالها بنت الامير
روّحت كفّ الندامه تفركه !!
"""""""""""""""""""""""""""""""""""""""""""""""""" """""""""""""""
أنتهى فصل الشتاء وأبتدا فصل الربيع
يا الهبوب الدافيه هبّي .. وغنيّ معي
.
ودّي آخذ من تناهيد صدري ما أستطيع
وانتي أخذي رعشة البرد من بين اضلعي
.
المشاعر جامده .. والغلا باله وسيع
والجوارح جاهزه للطواف وللسعي
.
والفراغ العاطفي علّة الرجل الشجيع
والكرامه تمنعه لا يحبّ ابلا وعي !
.
مسمعي ما يرتخي غير للسدّ المنيع
وين ابلقى صوت هادي يداعب مسمعي
.
ليت قلبي لا اشترا سلعته يقدر يبيع
لجل في سوق الهوى ما يضيّع موقعي !!
"""""""""""""""""""""""""""""
عليك الغلا منساب .. يا أمّ الحلا والزين
جمال العذارى بإسمك .. حزامه وتاجه
..
وزينك طبيعي بالمساحيق وش تبغين
ما يحتاج .. للمكياج منتي بمحتاجه
..
كريم الأساس وحمرة الفم وكحل العين
ترا اللي مصنّعها ما يعنيك بإنتاجه
..
خلقك الولي فتنه ومن تحتها خطيّن
يا كثر البنات الليّ عطيتيهن الصاجه !
..
تحيّرت في وصفك وفكّرت أجيك منين
وخفت الحسود يمرّك ويعقد حجاجه
..
نزيهة جناب ولا تسولف بك الواشين
ولا أنتي في سوق القيل والقال دوّاجه
..
أحبك وقلبي ما عطاك المحبّه لين
وقفتي على بابه ورحتي بمزلاجه
..
أدسّ المشاعر عنك وانتي بها تدرين
ومن دونك الدنيا ما تسوى ولا حاجه
"""""""""""""""""""""""""""""""""""""""""
يا قلب قلبي وروح الروح
ويا شفّ نفسي ومطلوبي
/
يا الغالي الحالي المملوح
عـلـّم مزاياك .. بعيوبي !
/
دخلت في صدري المفتوح
وأمسيت وأصبحت محبوبي
/
عينك بسرّ الغرام تبوح
تحكي لا لدّيتها صوبي
/
تنوب عن صوتك المبحوح
وأنا معك صمتي ينوبي
/
مير البلا رمشها ذابوح
يجبرني أغيّر اسلوبي !!