(حزام الأمان)
ضيـق الله صدرك يا وسيع البطان
ضيــعتك الروابــــع فــي دواليبها
كل ما دولبت بك من مكان لمكان
غابت الشمس وأرضك عاوي ذيبها
خيـم الياس فوقك وأمتحنك إمتحان
الهقاوي تغــرك لا تماري بها
ما بقا غير حاجه بعد فات الأوان
مير لا طق جولك .. ودها جيبها
شلت حمل البعير ورحت سبق الحصان
واعذاب الحمــول اللي تزوزي بها
الليالي تدور و لا عليها ضمـــان
قل سواة الله أبرك وش تسوي بها
وكلمة الحق بين الحنجره واللسان
ناشبه كل ما حاولت تبدي بها
يا عبيد البشوت وسادة البرلمان
لعـبوا أهل المناصب في مناصيبها
للعرب مستشار وللعجـم ترجمان
لو نمر الكنيسه ما نصلي بها
شابت رموش عيني يا الله المستعان
ودي أبعد نظرها مير واشيبها
والله اني ما أعرف الشمع والشمعدان
أعرف النار ما تومن مشاهيبها
اه يا كثر خوفي من حـزام الأمــان
يوم حزم ضلوعي قام يومي بها
زبدة العلم الأبيض ول يا آخر زمان
قص كم الحقيقه وأنفرا جيبها
يستبيح الشجيع ويستريح الجبان
ويشمط اللحيه الشمطا بأشانيبها
مطاليق الوجيه
يـــا مطـالـيـق الـوجـيـه الـحــر تكـفـيـه الأشـــاره
والأشــــاره والــعــه والــحــر مــغـــروم بـغـريـمــه
//
أسمي اللي تعرفونه بين الأسمـاء المستعـاره
ما أستعرته غير في نهج الدروب المستقيمه
//
كـل مـا جيـت أكشفـه وأرتـاح صليـت إستخـاره
قلـت خيـره وأستعـذت مـن الشياطيـن الرجيمـه