وش رايكم في ما يسمى ( الهكر ) ؟
البارح كنت فاتح منتدى الغنانيم وفاتح الماسنجر , وفجأه وليا واحد معرفه دخل الماسنجر بسم ( دكتور هكر من مكان غير معروف في الويب ) مدري من وين ظهرلي !!
المهم ويبدا يسولف معي , قال ( انت غنامي , اشوفك فاتح منتدى الغنانيم ) ؟ !!
وياخذ شوي وهو يقتبس بعض كلامي وانا اسولف مع واحد في الماسنجر !!
انا دريت ان الموضوع تهكير وان اللي يهرجني قد هكر الجهاز ! المهم قلت انت من وين ظهرت ووش تبى ؟ ولا عطاني جواب مقنع الا انه قال انا كل يوم ادخل على جهازين ولا ثلاثه من اجهزت الناس ادوج فيها و اذا تبي تعرفني اكتب في قوقل ( دكتور هكر ) ,, ورحت للعم قوقل وكتبت اسمه ولقيته معروف في الشبكه العنكبوتيه بالتهكيير وله دروس تعليم في الهكر وله مقاطع في اليوتيوب تهكير !!
المهم الرجال خربها معي وخربتها معه ثم قال لي ( و الله لو ما تسكت لخليك تشيل كمبوترك حديده !! ) 
قلت لا اسكت ولا افتح فمي داااايم بس انت تفارقني 
و الله يالربع ان كني اهرج لي جني 
المهم قال لي لا تزعجني ولا تفصل الاتصال , ثم فصلت الاتصال ورجعت ثم ظهرلي من جديد و قام يتلفظ بكلام وانا مقدر ارد علاه خايف انه يعطب الجهاز
المهم اخذ شوي وقال لي ( جهازك ما فيه غير الجووووع ) !!!
قلت غنامي والله ما تلقى وراي شي ولا انفعك بشي 
المهم راح يتلفظ يبا يرفع ظغطي علشان يلقى له سبب من اجل يعطب الجهاز المهم تحملته شوي
ثم قال انا طالع ولكن ابا ازور كمبيوترك عن قريب انتظرني !!
قلت الله ( لا ) يحيييييك في اي وقــت 
في اخر الكلام قال ابا انصحك نصيحه << << ما تعرفله نوب ينصح ونوب يهدد
كانت نصيحته ( لا تسجل في المنتديات بإيميلك الشخصي )
انا استغربت من نصيحته .! هل يستطيع ان يدخل على لوحة التحكم وياخذ ايميلي ؟!!!
ثم طلع وهو يتوعد بالرجوع عن قريب .. مدري وش سلقطه علي بالذات ,,
ثم طفيت الجهاز وقضيت الليله بدون نت
بعدين الهكر معه سلطه ما تقدر تناقشه يعطب الجهاز ولا يجيب لك مطمه 
حبيت من هالموضوع ان اتناقش معكم حول قضية التهكير , و التطفل على اجهزة الخلق !!
هل هذا منطق ؟ وهل من الاعضاء سبق و حصل له مثل ما حصل لي ؟
احترامي للجميع.
[ih.; lh tdi ydJJv hg[,,,,,,,,u !!!