تعالو يا احباني ابغا انبعط واعلمكم وش صارلي هاليومين من مواقف وترا مايحتاج تنشدوني لاني معلم معلم الله لايعوق بشر
وهي جاني واحد من اخوياي مقرود وقال خاوني للساحل في جنوب جده على بعد 200 كيلو فيه قناصة صقور ورحت معه واخذنا يوم ونص في الخلا وبعيد عن الزفلت والاوادم وما شفنا لا صقور و لاصيد المهم يوم جاء العصر في اليوم الثاني وانا تعبان من قل النوم والعزره مع البران ووجهي متقرفط من الصلف و ليا خويي المقرود يقوم يصيح وينادي وينخا وزاني ويتل الموتر وينقز العقوم ويقول ابشر بالصيد وقلتله العلم ويش انت منلحس وش فيك قال انت تشوف الصقر الحر عانه فوق في السماء وهاك الدربيل شفه ويوم عاينت في السماء ليني اشوفلي طير بعيد مدري هو صقر ولا غراب ولا شحيمي وقلت انت خبل وش ادريك ان هذا صقر وبعدين هذا ديرته ماهي قريب ويبغا يوقع في حدود اليمن لانه بعيد وقال اللي مايعرف الصقر يشويه خلك جنبي واسكت انت مامنك فود في القناصه والمهم الرجال متهور ومتحمس ويطرد الطير اللي في السماء وانا سكت وقلت نشوف اخرتها مع هالمبلي وبعد نص ساعه صار الطير قريب من الارض وصرت اشوفه بالعين المجرده وتحمست معه وطار النوم وصرنا نوب نغفل عن السياره ونعاين فيه المهم طلع فيه ناس غيرنا يتبعون الطير ويطردونه ومع الوقت بدينا نقرب من بعض ومن زود الشفاحه بينا وبينهم تصادمنا في الخلا والطير راح والمواتر انعدمت وحنا قعدنابها واخذنا ساعتين مالقينا من يشيلنا ويسحب مواترنا وجانا مشببن واسعفنا حنا وسياراتنا
وبعدين ان كان لكم نيه في شراء الطير عطوني سومتكم ويصير خير